भांगरभूंय | प्रतिनिधी
भांगरभूंय । प्रतिनिधी
वाळपयः छत्रपती शिवाजी म्हाराजाचें कार्य दरएकल्याक खातीर अभिमानाचें आसा. हिंदवी स्वराज्याची स्थापणूक करून सगल्या घटकांक न्याय मेळोवन दिवपाचें काम म्हाराजान केलें. दुर्दैवान तांच्या वावरा विशीं कांय जाण दुबाव उक्तायतात. अशा लोकांचेर विश्वास दवोरनास्तना म्हाराजाचें काम समाज प्रेरीत आशिल्ले हाची जाणविकाय तरणाटे पिळगेक करून दिवपाक जाय अशें भिरोंडें पंचायतीचो सरपंच उदयसिंह राणे हांणे वाळपय छत्रपती शिवाजी म्हाराज जयंती उत्सव समितीन आयोजीत केल्ले म्हयन्याळें कार्यावळीत उलयतना सांगलें.
वाळपय पालिकेचो नगरसेवक वसियुद्दीन सय्यद हाचे हस्तुकीं छत्रपती शिवाजी म्हाराजाच्या अश्वारुढ पुतळ्याक फुलां हार घातलो. ह्या वेळार नगराध्यक्ष सेहझीन शेख, नगरसेविका प्रसन्ना गांवस, नगरसेवक विनोद हळदणकार, समतीचो पदाधिकारी उदय सावंत, सुभाषचंद्र गांवस, मिलिंद गाडगीळ, प्रदीप गवंडळकार हाजीर आशिल्लो.
छत्रपती शिवाजी म्हाराज पालिका बागेचें सोबितीकरणाचें काम रोखडेंच जातलें. पालिकेन ते खातीर फुडाकार घेवचो अशें उदयसिंह राणेन मागलें. हे संबंदी वाळपयचो आमदार आनी भलायकी मंत्री विश्वजीत राणे हाचे कडेन उलोवणी करपाचें उतर सेहझीन शेख हिणे दिलें. वाळपय वाठारा सर्वधर्म समभाव जपपी आसा. हांगा कसलेच तर्चो गोंदोळ जावचो न्हय हे खातीर दरेकल्यान सतर्क रावचें अशें तिणे मागलें. शिवाजी म्हाराजाचो नवो पुतळो उबारपा संबंदी विश्वजीत राणे हांचे कडेन उलोवणी करपाचें आस्वासन तिणे दिलें. कार्यावळीचें सूत्रसंचालन मिलिंद गाडगीळान केलें आनी उदय सावंतान उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
