भांगरभूंय | प्रतिनिधी
पणजी : छत्रपती शिवाजी महाराज तशेंच छत्रपती संभाजी महाराज हांचे जिणेचेर आधारीत धड्यांचो आसपाव पाठ्यपुस्तकांत जातलो. तांचें शौर्य आनी कार्य हांची वळख विद्यार्थ्यांक जावची, होच हेत हाचे फाटल्यान आसा, अशी लेखी जाप मुख्यमंत्री डॉ. प्रमोद सावंत हांणी दिल्या. आमदार कृष्णा साळकार हांणी हो लेखी प्रस्न विचारिल्लो.
छत्रपती शिवाजी महाराज आनी संभाजी महाराज हांचे जिणेचेर आधारीत धडे सध्या यत्ता चोवथी आनी सातवेक आसतले.
राज्यांत राष्ट्रीय शिक्षण धोरणाची कार्यवाही सुरू जाल्या. एनसीईआरटीचीं पुस्तकां लागू करपाचो निर्णय सरकारान घेतला. पयली, दुसरी, तिसरी आनी सवेचे यत्ते खातीर पुस्तकां लागू जाल्यांत. चवथी, पांचवी, सातवी, आठवी, णववी आनी धावेचे यत्ते खातीर एनसीईआरटीचीं पुस्तकां लागू जातलीं. हीं पुस्तकां आजून येवंक नात. तीं आयले उपरांत छत्रपती शिवाजी महाराज, संभाजी महाराज तशेंच देशा खातीर व्हड योगदान दिल्ल्या राष्ट्रपुरूषांचे धडे अभ्यासक्रमांत लागू करतले.
सध्या मराठींत ‘खंडोजींचे कर्तव्यपालन’ आनी इंग्लिशींत ‘मराठा’ हे धडे अभ्यासक्रमांत आसात, अशी लेखी जाप शिक्षणमंत्री ह्या नात्यान डॉ. सावंत हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
