भांगरभूंय | प्रतिनिधी
जाणता राजा छत्रपती शिवाजी महाराजांचो नवो इतिहास तांच्या इतिहासाचें पुनर्लेखन करपी इतिहासाच्या कांय नव्या अभ्यासकांनी पयलींच्या तांच्या चरित्र इतिहासा परस नवे नवे निश्कर्श काडीत तांच्या चरित्राची फेरमांडणी सुरू केल्या. पूण आतां ह्या सगल्या शिवचरित्राच्या नव्या इतिहासा परस सामको वेगळो असो इतिहास कन्नड साहित्यीक वाय. आर. पाटील हांणी सांगिल्ल्यान बेळगांव आनी शिमे वाठारांतल्या मराठी भाशिकां मदीं तिडकीचें ल्हार पातळ्ळां.
बेळगांवच्या कन्नड साहित्य भवनांत कर्नाटक राज्य विकास संस्थे वतीन आयोजीत केल्ले कार्यावळींत पाटील हांणी आपली अक्कल घाणाक दवरून छत्रपती शिवाजी महाराज हे कन्नड समाजांतले कन्नड वंशाचे आशिल्ले, असो दावो करून छत्रपती शिवाजी महाराज हे लिंगायत वंशाचे आशिल्ले, असो नवो इतिहास सांगिल्ल्यान मराठी भाशिकां मदीं तिडकीचें ल्हार पातळ्ळां.
नामनेचे साहित्यीक रा. चिं. ढेरे हांच्या साहित्याचो चुकीचो संदर्भ दिवन तांणी छत्रपती शिवरायांक कन्नड आनी लिंगायत वंशाचे आशिल्ल्याचो अजापीत करपी दावो केला. लिंगायत समाजाचें कुलदैवत श्री शैल्य मल्लिकार्जून हें छत्रपती शिवरायांचें कुलदैवत आशिल्ल्याचो दावो करून होच नवो इतिहास सादर करून बेळगांवां कन्नड आनी मराठी भाशिकांचें भावपणाचें नातें आशिल्ल्याचें सांगलें. बेळगांव आनी शीम वाठारांत कन्नड भाशिकांचेंच वर्चस्व आशिल्ल्याचें समर्थन करपा खातीर छत्रपती शिवरायांचो हो असो नवो इतिहास सांगून पाटील हांणी नव्या वादाची चूड पेटयल्या.
कर्नाटक राज्याचेर छत्रपती शिवरायांचे बापूय राजे शहाजी हांचीच राजवट आशिल्ली. 1638 ते 1664 ह्या काळांत शहाजी महाराजांनी राजधानी बंगळुरू आशिल्ली. भुरगेपणांत छत्रपती शिवरायांचें भुरगेपण कांय वर्सां बंगळुरूंत आपल्या बापाय कडेनूच गेल्ल्याचें तांणी सांगलें. शहाजी महाराजा उपरांत छत्रपती शिवरायांचे सावत्र भाव व्यंकोजीराजेश हांणी लेगीत सुरवेच्या काळांत बंगळुरू शारांतल्यान जहागिराचो कारभार केलो. मुखार तांणी तंजावर प्रांत जिखले उपरांत तंजावर ही राजधानी केली. पेशवायेच्या मराठी साम्राज्याच्या काळांत थेट बेल्लारी मेरेन मराठ्यांची सत्ता आशिल्ली. पेशव्यांचे सरदार त्या वाठारांत राजकारभार करताले. त्या वाठारांतल्या राजकारभाराची भाशा मराठीच आशिल्ली.
छत्रपती शिवरायांनी कर्नाटकाचे स्वारीत बदमानी, गजराज हे किल्ले जिखले जाल्यार गजेंद्रगड हो नवो किल्लो लेगीत बांदलो. कर्नाटकातचो कांय वाठार तांणीच स्वराज्यांत हाडलो. कर्नाटकाचे मोहिमेचेर आसतनाच तांणी श्री शैल्य मल्लिकार्जूनाचें दर्शन घेतलें आनी अभिषेकूय केलो. परततना तिरुपतीच्या श्री व्यंकटेश्वराचेंय दर्शन घेतलें. छत्रपती शिवरायांचे कुलदैवत तुळजाभवानी आनी तांचो वंश मराठा आसतनाय पाटील हांणी ते शुद्ध कन्नड आनी लिंगायत वंशाचो आशिल्ल्याचो नवो इतिहास सांगून छत्रपती शिवराय हे कन्नडूच आशिल्ल्याचो केल्लो दावो पुरायपणान फट आसा. छत्रपती शिवराय हे पुराय भारत आनी जगाचे दैवत आसले तरी ह्याच कर्नाटकांत मराठी भाशा दुस्वासी कर्नाटक सरकार आनी कन्नड चळवळी गारू ह्या सारक्या कन्नड अभिमानी संस्था छत्रपती शिवरायांच्या स्वराज्याच्या भगव्या बावट्याचो आनी मराठी भाशेचो दुस्वास करतात. ह्याच कर्नाटक सरकारान बेळगांव म्हापालिकेचेर हुबत आशिल्लो भगवो बावटो सक्तीन काडून उडयलो. बेळगांवां शिमे वाठारांत जय महाराष्ट्र आनी जय शिवराय म्हणप गुन्यांव थारायलो. शीम वाठारांतल्या मराठी भाशिकांचेर कन्नड सक्ती करप सुरूच आसा. हे फाटभुंयेर पाटील हांणी केल्लें उलोवप छत्रपती शिवचरित्राची पुरायपणान मोडतोड करपी जाल्यार आसाच. पूण तांचो अवमान करपी आशिल्ल्यानूच महाराष्ट्र सरकारानूय ताची गंभीर दखल घेवंक जाय.
शिवाजी विठ्ठल चौगुले
9867732504
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
