भांगरभूंय | प्रतिनिधी
अंबिकापूर, खबरां संस्था ः हॉस्टेलांत शिकपी एका विद्यार्थिनीक तिच्याच भयणीच्या देरान तीन इश्टां सयत गोंयांत हाडून सात दीस सामुहीक बलात्कार केलो. अशी कागाळ पिडित चलयेन सुरगुजाच्या गांधीनगर पुलिशेंत केल्या. छत्तीसगढच्या अंबिकापूर जिल्ह्यांतल्यान ही धक्को दिवपी घडणूक उजवाडाक आयल्या. ह्या प्रकरणांत पुलिसांनी अपहरण आनी सामुहीक बलात्कार ह्या आरोपांत चार जाणांक अटक केल्या. हे घडणुकेंत वापरिल्ली गाडी आनी तीन दुचाकी जप्त केल्यात.
सुरगुजाचे सहाय्यक पुलीस अधीक्षक अमलोक सिंह ढिल्लन हांणी ही म्हायती थळाव्या पत्रकारांक दिली. 5 मे दिसा एक तरणाटी अंबिकापूरच्या गांधीनगर पुलीस स्टेशनांत पावली. तिणें आपल्याचेर सामुहीक बलात्कार जाल्ल्याची कागाळ थंय दाखल केली. ह्या प्रकरणांत शुभम उजेरिया, अनुराग उजेरिया, संजय चौधरी आनी पुष्पराज लकडा हांकां रिमांडाचेर घेतल्यात, अशें ढिल्लन हांणी सांगलां.
ही तरणाटी अजर्मा गांवांतल्या हॉस्टेलांत रावता. 15 जानेवारी 2024 दिसा ती आपल्या भयणीच्या घरा वचपाक हॉस्टेलांतल्यान भायर सरली. थंय तिका दोन सोयरे मेळ्ळे. भयणीच्या घरा पावयता अशें सांगून तिका गाडयेंत बसयले. गाडयेंत आनीक दोन तरणाटे पयलींच आशिल्ले. तांणी पयलीं तिका लागसारच्या निर्जन सुवातेर व्हरून तिचेर सामुहीक बलात्कार केलो. उपरांत सरळ गोंयांत हाडलें. हांगा 22 जानेवारी मेरेन तिका वेगवेगळ्या सुवातींनी व्हरून थंय तिचेर बलात्कार केलो. उपरांत ते चलये वांगडा अंबिकापूराक परत गेले आनी तिका भयणीच्या घरा व्हरुन पावयलें अशें कागाळींत पिडित चलयेन नमूद केलां.
कोणाक कांयच सांगचें न्हय अशी धमकी तिका दिल्ली. देखून चली भियेवन ओगी रावली. एक दीस तिणें आपल्या कुटुंबाक ही गजाल सांगपाचें धाडस केलें. ते उपरांत कुटुंबान तिका गांधीनगर पुलीस स्टेशनांत हाडली. थंय ह्या चार जाणांचेर सामुहीक बलात्काराची कागाळ दाखल केली. कागाळी उपरांत पुलिसांनी एमसीबी जिल्ह्यांतल्या मनेंद्रगड आनी सूरजपूर जिल्ह्यांतल्या कुमडा हांगाच्या तीन आरोपींक अटक केल्या. तशेंच एका मनशाक दुसरे सुवाते वयल्यान अटक केल्या अशें अधीक्षक ढिल्लन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
