भांगरभूंय | प्रतिनिधी
लखनौ, खबरां संस्था: भारतात मान्सून हंगाम 30 सप्टेंबराक सोंपलो. मात खुबश्या राज्यांनी पावस चालूच आसा. बुधवारा छत्तीसगडांत पावस आनी वीज कोसळिल्ल्यान चार जाणांक मरण आयलें. बिरेस्तार सावन फुडले तीन दीस राज्यांतल्या 28 जिल्ह्यांनी घोग्यांनी पावसाची शिटकावणी दिल्या.
बुधवारा बिहारांतल्या बक्सर आनी नवादा जिल्ह्यांत वीज कोसळून तिगांक मरण आयलें. आयज राज्यांतल्या 35 जिल्ह्यांनी नेटान वारें आनी वीज वांगडा घोगांनी पावस पडपाची शक्यताय आसा. पावस 7 ऑक्टोबर मेरेन चालूच आसतलो.
उत्तर प्रदेशांतल्या 36 जिल्ह्यांनीय पावसाची शिटकावणी दिल्या. बुधवारा जालौन हांगा पावस आनी वीज पडिल्ल्यान 100 वर्सां आदलें देवूळ कोसळ्ळें. एका शेतकाराक वीज पडून मरण आयलें. मध्य प्रदेशांतल्या पन्ना हांगा आनीक एका मनशाचेर वीज पडली.
फुडल्या 96 वरांनी अरबी दर्या आनी बंगालच्या उपसागरांत कांय प्रमाणांत अशांतता येवपाची शक्यताय आसा. हवामान तज्ञांचा अंदाजा प्रमाण ह्या काळांत तीन मुखेल हवामान प्रणाली सक्रीय जावपाक शकतात. ह्यो प्रणाली काश्मीर पसून कन्याकुमारी मेरेन, पर्वतां पसून मैदाना मेरेन हवामान बदलतलो.
देशांतल्या 13 राज्यांनी नेटान वारें, दाट ढग आनी घोग्यांनी पावस पडपाची शक्यताय आसा. जातूंत आंध्र प्रदेश, तेलंगणा, कर्नाटकाचो कांय भाग, पश्चीम बंगाल, ओडिशा, झारखंड, छत्तीसगड, बिहार, मध्य प्रदेश, महाराष्ट्र, गुजरात, राजस्थान, उत्तर प्रदेश, उत्तराखंड, जम्मू आनी काश्मीराचो आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
