भांगरभूंय | प्रतिनिधी
जगदलपूर, खबरां संस्था: छत्तीसगडच्या सुकमा आनी दंतेवाडो जिल्ह्यांचे शिमेर शेनवारा सकाळीं पुलीस आनी नक्षलवाद्यां मदीं फारपेट जालो. डीआरजी (जिल्हो राखीव रक्षक) आनी सीआरपीएफच्या ५००-६०० सैनिकांनी १७ नक्षलवाद्यांक मारले. हातूंत ११ बायल नक्षलवाद्यांचो आसपाव आसा. केरळपल्ले पुलीस स्टेशन वाठारांतल्या उपमपल्लींत हो फारपेट जालो.
मरण आयिल्ल्या नक्षलवाद्यां मदीं नक्षल संघटणेचो एसझेडसीएम- स्पेशल झोनल कमिटी वांगडी जगदीश उर्फ बुधरा हाचो आसपाव आशिल्लो. बुधरा हाचेर २५ लाख रुपयांचें इनाम जाहीर केलां. ताचो दरभा खोर्यांतले झीरम घडणुकेंत आसपाव आशिल्लो. २०१३त घडिल्ले हे घडणुकेंत कॉंग्रेस फुडारी महेंद्र कर्मा हांचे सयत जायत्या व्हडल्या फुडार्यांचो आसपाव आशिल्लो.
ह्यान पयलीं २५ मार्च दिसा सुरक्षा दळांनी ३ नक्षलवाद्यांक मारिल्ले. जातूंत नक्षलवादी सुधीर उर्फ सुधाकर हाचोय आसपाव आशिल्लो. जाचेर २५ लाख रुपयांचें इनाम आशिल्लें. अंदूं आतां मेरेन बस्तर रेंजांत सैनिकांनी १०० नक्षलवाद्यांक तोंड दिलां. हातूंत २० मार्च ते २९ मार्च मजगतीं, म्हळ्यार फकत १० दिसांनी ४९ नक्षलवादी मारले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
