भांगरभूंय | प्रतिनिधी
छत्तीसगड, खबरां संस्था: छत्तीसगडांतल्या बस्तर वाठारांत सुरक्षा दळा वांगडा जाल्ले फारपेटींत चार नक्सलींक मरण आयलें. जाल्यार एक पुलीस शहीद जालो. हो फारपेट सांजेवेळार नारायणपूर आनी दंतेवाडो जिल्ह्यांतले शिमेचेर दक्षिणेंतल्या अबूझमाडच्या रानांत जालो. ह्या वेळार डीआरजी (डिस्ट्रिक्ट रिझर्व्ह गार्ड) आनी एसटीएफचो जोड पंगड नक्षलविरोधी मोहिमेचेर गेल्ले. हे फारपेटींत डीआरजीचे हेड कॉन्स्टेबल सन्नू करम हे शहीद जाल्ल्ळाची म्हायती एका वरीश्ठ पुलीस अधिकार्यान दिली.
फारपेटी उपरांत चार नक्सलींच्यो कुडी आनी एके-४७ रायफल आनी सेल्फ लोडिंग रायफल (एसएलआर) सयत हेर शस्त्रां घडणुके सुवातेवेल्यान जप्त केलीं. मजगतीं, फारपेटी उपरांत सोदमोहीम चालूच आशिल्ली. नारायणपूर, दंतेवाडा, कोडागांव आनी बस्तर जिल्ह्यांत डीआरजी पंगडा वांगडा नक्सल विरोधी मोहीम शुक्रारा सावन सुरू केल्ली.
मजगतीं, मुख्यमंत्री विष्णू देव सहाय हांणी सुरक्षा दळ नक्सलवादा आड लढटा. ही समस्या सोंप मेरेन लढाय चालूच उरतली. तशेंच शहीद सन्नू करम हांचें बलिदान व्यर्थ वच्चें ना अशें ‘एक्सा’चेर तांणी सांगलें.
फाटल्या वर्सा २१९ नक्सलींक सोंपयिल्ले
ह्यान पयलीं ३ जानेवारीक छत्तीसगडांतल्या गरियाबंद जिल्ह्यांत सुरक्षा दळा वांगडा जाल्ले फारपेटींत एका नक्सलीक मरण आयिल्लें. हो वाठार रायपूर विभागांत येता. मजगतीं, पुलिसांनी दिल्ले म्हायती प्रमाण, फाटल्या वर्सा राज्यांत विंगड विंगड सुवातांचेर सुरक्षा दळान २१९ नक्सल्यांक मारून उडयिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
