भांगरभूंय | प्रतिनिधी
नवी दिल्ली, खबरां सस्था ः च्या वा कॉफी पियेवप बरें न्हय अशें सांगतात. पूण, आतां एक नवें संशोधन मुखार आयलां. संवसारभर कॅन्सराचे दुयेंती वाडत आसात. ह्या दुयेंसा संबंदीं सतत संशोधन चालू आसा. मुखार आय्लल्या संशोधना प्रमाण च्या वा कॉफी पियेल्यार तकली, मान, तोंड आनी गळ्याचो कॅन्सर जावपाचो धोको उणो जाता अशें तांतूत म्हणलां.
कॅन्सर ह्या नेमाळ्यांत उजवाडाक आयिल्ल्या एका अभ्यासा प्रमाण दिसाक तीन – चार कप कॉफी पियेल्यार तकलेचो आनी मानेक कॅन्सर जावपाचो धोको 17 टक्क्यांनी उणो जाता, जाल्यार एक कप च्या पियेल्यार 9 टक्क्यांनी धोको उणो जाता.
हजारांनी दुयेंतींचेर केलें संशोधन…
ह्या अभ्यासा खातीर संशोधकांनी तकलेचो आनी मानेक कॅन्सर आशिल्ल्या सुमार 9,550 आनी कॅन्सर नाशिल्ल्या सुमार 15,800 दुयेंतींचो आस्पाव आशिल्ल्या 14 अभ्यासांतल्या डेटाचें विश्लेशण केलें. कॉफी पियेवनाशिल्ल्या लोकांचे तुळेंत दर दिसा चार कप परस चड कॅफिनेटेड कॉफी पियेवपी लोकांक तकलेचो आनी मानेक कॅन्सर जावपाचो धोको 17 टक्के उणो आशिल्ल्याचें दिसून आयलें. तांकां तोंडाचो कॅन्सर जावपाचो धोको 30 टक्के उणो आनी गळ्याचो कॅन्सराचो धोको 22 टक्के उणो आशिल्लो.
तीन ते चार कप कॅफीनयुक्त कॉफी पियेल्यार हायपोफॅरिंजियल कॅन्सर (गळ्यांतल्या कॅन्सराचो एक प्रकार) जावपाचो धोको 41 टक्क्यांनी उणो जाता. तशेंच कॅफिनेटेड कॉफी पियेल्यार तोंडाच्या पोकळ कॅन्सराचो धोको 25 टक्क्यांनी उणो जाता.
एक कप च्या पियेल्यार तकलेचो आनी मानेचो कॅन्सर जावपाचो धोको णव टक्क्यांनी आनी हायपोफॅरिंक्साचो धोको 27 टक्क्यांनी उणो जाता. पूण दिसाक एक कप परस चड च्या पियेल्यार स्वरयंत्राच्या कॅन्सराचो धोको 38 टक्क्यांनी वाडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
