च्याचें उत्पादन उणें, गिरायकांक जातलो त्रास

भांगरभूंय | प्रतिनिधी

वा यट हवामानाक लागून अंदूं सगळ्या पिकांचेर परिणाम जाला. भारतीय च्या मंडळाच्या आंकड्यां प्रमाण अंदूं हवामानाक लागून च्या उत्पादनाचेर व्हड परिणाम जालां. मे म्हयन्यांत च्या उत्पादनाचेर 9.09 कोटी किलो मेरेन देंवलां. मजेची गजाल म्हळ्यार च्याच्या दरांत 20 टक्के वाड जाल्ल्या. हालींच हांवें ही खबर वाचली. फाटल्या 10 वर्सांतली ही च्या उत्पादनांतलो सगल्यांत उणो आंकडो. विशेश म्हणल्यार च्या कंपनींच्या शेअर दरांत सोळा टक्क्यां मेरेन वाड जाली. तीं च्याय कंपनीं म्हळ्यार जय श्री टी अॅण्ड इंडस्ट्री, मॅकलॉड रसेल इंडिया आनी रोशेल इंडिया.
2024 वर्साचे सुरवेक च्याचें उत्पादन उणें आसलें तरी निर्यातींत 37 टक्क्यांनी वाड जाल्या. इजिप्त, इराण, इंग्लंड आनी इराक ह्या देशांनी च्याची निर्यात जाता. आसाम सारक्या वाठारांनी हुंवाराक लागून च्या पिकांचें लुकसाण जालें. दक्षीण भारतांतल्या कांय सुवातींनी पावसाच्या उणावाक लागून च्याचें पीक उणें जालें. हाचे भायर केंद्र सरकारान उत्पादन करपी वाठारांनी 20 कीटकनाशकांची विक्री करपाचेर बंदी घाल्या, देखून उत्पादन उणें जालां. सेंद्रीय साऱ्याचो आग्रो धरप्यांनी हो मुद्दो मतींत घेवपाक जाय. अर्थांत रासायनीक साऱ्याचो चड वापर जावपाक जायना. तें आमचे भलायकेक मारक थारूं येता. आमी सगल्यांनी श्रीलंकेंत सेंद्रीय साऱ्याचो अतिरेक केल्ल्यान कितें जालें, ताची म्हायती वाचल्यार बरी.
उत्पादन देंविल्ल्यान अंदूं च्या मारग जाला. ताचो परिणाम दिसपट्ट्या जिविताचेर जातलो, हातूंत दुबाव ना. आयज सादारणपणान दर एका कुटुंबांत च्याचो वापर जाता. हाचे भायर सगल्याच कंपनींनी आनी कार्यालयांनी च्याचो वापर व्हड प्रमाणांत जाता. च्याय उत्पादन उणें जाल्ल्यान सगळ्यांचेर परिणाम जातलो. आयज च्या पियेना असो मनीस सोंपेपणान मेळना. सदची च्या पियेवच्या बदला थोडे ग्रीन टी पियेतात. ती पसून एक प्रकाराची च्याच. देखून च्या उत्पादन देंविल्ल्याचो सगळ्यांचेरुच परिणाम जातलो. एनडीए सरकारान हाचेर कितें तरी उपाय येवजण करची.
मावंट एव्हरेस्टाचेर कोयराची रास
हिमालयांतलें मावंट एव्हरेस्ट हें संवसारांतलें सगळ्यांत ऊंच तेमक मानतात. देशांतले आनी परदेशांतले जायते पर्यटक आनी गिर्यारोहक तें चडपाखातीर थंय वतात. ह्या सगळ्यांत उंच तेमकाची उंचाय 29035 फूट आसून ताचेर चडप हें एक आव्हान. सोंपें काम न्हय तें. संवसारभरांतले पर्यटक तशेंच गिर्यारोहक थंय चडपा खातीर येतात आनी सांगपाक वायट दिसता की थंय व्हड प्रमाणांत कोयर निर्माण करतात. कोयर करप ही मनशाची प्रवृत्ती आनी ती उणी जावपाची तशी शक्यताय ना.
एव्हरेस्ट वाठारांत आशिल्लो हो कोयर सुमार 40 ते 50 टन इतलो आसा, असो अदमास शेर्पा पांगडाचे अंग बाबू हांणी केला. तातूंत पोरणें पिंजिल्ले तंबू, खाणाचीं पाकिटां, उदकाचे कॅन, गॅस कार्टीज, आॅक्सिजनाच्या बाटल्यो, दोरयो हांचो आसपाव आसा. शेर्पा पंगड कोयर काडपाचो यत्न करतात तरी कोयर पुरायपणान काडप शक्य जावंक ना.
तेंमक चडपा खातीर वेगवेगळे कॅम्प उबारतात. दक्षीण शिबिराचेर 26000 फूट उंचायेचेर हो कोयर पडला. तो काडून उडोवपा खातीर नेपाळ सरकाराचे यत्न चालू आसात. भारत सरकारानूय तांकां मजत करपाक जाय. हो कोयर काडपाक गेल्ल्या पंगडांक जायत्या समस्यांक तोंड दिवचें पडटा. वायट हवामान, बर्फाचे वादळ, चड उंचायेचेर ऑक्सिजनाचें प्रमाण उणें, बर्फांत कोयर खणपाक अडचणी येवप हीं कारणां. ताका हिमालय आडवाद ना. हिमालयाचेर वचपी पर्यटकांनी थंय कोयर जावचो ना हाची जतनाय घेवप खूब गरजेचें. नाजाल्यार एक दीस हिमालय उध्वस्त जातलो. संवसारीक म्हत्वाची सुवात आशिल्ल्यान थंय सैमीक वातावरण आसप खूब गरजेचें.
आयज हिमालयाची अशी स्थिती आसा, पूण जायत्या दर्यांची परिस्थिती ताचे परस वायट आसा. थंय हजारांनी टन प्लास्टीक कोयर एकठांय जाता तसो तो उदकांतल्या जिवांक समस्या निर्माण करपाक लागला. एकूणच मनशान आमचे खातीर ही आपत्ती हाडल्या. सैमाची संतुळा राखप गरजेचें. मनशान हें कित्याक विसरचें? अशे जायते प्रस्न ह्या प्रसंगाचेर उप्रासतात.
रोबोटाची आत्महत्या
सद्या जायत्या सुवातींनी रोबोट काम करतात. खास करून युरोप आनी अमेरिकेंत ताचें व्हड प्रमाण आसा. भारतांतय जायत्या सुवातींनी तांणी प्रवेश केला. हातूंत केरळांतले एके शाळेंत शिक्षक म्हणून येसस्वीपणान काम करपी रोबोटाची बातमी उजवाडाक आयल्या. रोबोटांक लागून लोकांची जीण ल्हव जाल्या. लोक विज्ञानांक कितलेंय नांव दवरूं वा कांय लोक मनातल्या मनांत गाळी संवूं, पूण रोबोट वा हेर आधुनिक उपकरणांक लागून आमचे त्रास खूब उणे जाल्यात.
सध्या लोकांचेर खूब ताण आसा. हे तणाव वेगवेगळ्या कारणांक लागून जातात. हातूंत नोकरी आनी कुटुंबीक ताण हांचो आस्पाव जाता. फकत पयशांनी सुख मेजपाची वृत्ती आशिल्ल्यान जायत्या जाणांक ताण येता. हातूंत कामाचें वजेंय म्हत्वाचो घटक. हाका लागून फकत मनशांक न्हय तर रोबोटांकय त्रास जाला, अशें दक्षीण कोरियेंतल्यान आयिल्ले एके खबरे वरवीं कळ्ळां.
ते खबरे प्रमाण कामाच्या ताणांतल्यान रोबोटान आत्महत्या केल्या. काम करतना दोन मिटर उंच आशिल्ल्या सोपणां वयल्यान उडी मारून ताणें आत्महत्या केल्या. ताचे कुडके जाले. आतां खास अधिकारी हे विशीं चवकशी करतात. हो रोबोट गुमी सिटी कावन्सिलांत काम करतालो. ह्या रोबोटान आत्महत्या केल्या उपरांत ह्या गुमी शारांतले लोक निर्शेल्यात.
रोबोटांत सादारणपणान मनशाच्या भावनां भशेन भावना आसतात हें पयलेच खेपे दाखयलां. हें अर्थांतच धक्को दिवपी. हाचो परिणाम फुडल्या काळांत जायत्या रोबोट वापरप्यांक दिसपाची शक्यताय आसा.