भांगरभूंय | प्रतिनिधी
भांगरभूंय । प्रतिनिधी
पणजी : मुख्यमंत्री डॉ. प्रमोद सावंत हांणी दिल्ली भेटींत प्रधानमंत्री नरेंद्र मोदी आनी राष्ट्रीय अध्यक्ष जे. पी. नड्डा हांचे कडेन मंत्रीमंडळ फेरबदल तशेंच राजकी स्थितीचेर चर्चा केली. दिल्ली विधानसभा वेंचणूक निकाला उपरांत गोंयांत मंत्रीमंडळ फेरबदल निश्चीत आसा. मंत्र्यांच्या प्रगतीपुस्तकाचेर आदारीत 4 जाणांक ‘नाल्ल’ दिवपा सयत 4 जाणांक मंत्रीपदाची संद मेळटली. गोपां कडल्यान ही म्हायती मेळ्ळ्या. केंद्रीय मंत्र्यांच्यो भेटी घेवन प्रदेश अध्यक्ष दामू नायक हांचे सयत मुख्यमंत्री डॉ. प्रमोद सावंत हे बिरेस्तारा सांजे गोंयांत पावले.
प्रधानमंत्री नरेंद्र मोदी आनी हेर फुडाऱ्यां कडेन सरकाराचीं कामां, तरेकवार प्रकल्प आनी पक्षाच्या प्रस्नाचेर चर्चा जाली, अशें मुख्यमंत्री डॉ. प्रमोद सावंत हांणी दाबोळी विमानतळार आयल्या उपरांत सांगलें. विकासकामां, पर्यटन, 16 व्या वित्त आयोगा कडेन मागिल्लो निधी ह्या विशयाचेर चर्चा जाली. मंत्रीमंडळ फेरबदला विशीं मात मुख्यमंत्र्यांनी कसलीच प्रतिक्रिया दिवंक ना.
सरकार आनी पक्ष जेन्ना वांगडा वावर करता तेन्ना सगळ्यो गजाली सुरळीत चलतात, अशें प्रदेश अध्यक्ष दामू नायक हांणी सांगलें.
मुख्यमंत्री डॉ. प्रमोद सावंत हे अचकीत बुधवारा दिल्ली गेले. बुधवारा तांणी केंद्रीय पर्यावरण आनी रान खात्याचे मंत्री भूपेंद्र यादव, केंद्रीय अर्थमंत्री निर्मला सीतारामन आनी केंद्रीय गृहमंत्री अमीत शाह हांची भेट घेतली. हाचे उपरांत बिरेस्तारा तांणी केंद्रीय भलायकी मंत्री तशेच राष्ट्रीय अध्यक्ष जे. पी. नड्डा, संरक्षण मंत्री राजनाथ सिंग आनी पंतप्रधान नरेंद्र मोदी हांची भेट घेतली. राष्ट्रीय अध्यक्ष जे. पी. नड्डा हांचे भेटी वेळार तांचे सयत प्रदेश अध्यक्ष दामू नायक हाजीर आशिल्ले.
उदरगती विशीं प्रधानमंत्र्यांचें घेतलें मार्गदर्शन
गोंय सरकारान सुरू केल्ल्या तरेकवार उपक्रमांची म्हायती मुख्यमंत्री डॉ. प्रमोद सावंत हांणी प्रधानमंत्री नरेंद्र मोदी हांकां दिली. उदरगतीचे वाटचाली विशीं प्रधानमंत्र्यांचें मार्गदर्शन घेतलें. सरकाराची कामगिरी आनी राजकी स्थितीची म्हायती प्रधानमंत्र्यांक दिल्ल्याचें मुख्यमंत्र्यांनी सांगलें
हेलिकॉप्टर दुरुस्ती प्रकल्प बेगिनूच
केंद्रीय संरक्षण मंत्री राजनाथ सिंग हांची मुख्यमंत्र्यांनी बिरेस्तारा भेट घेतली. संरक्षण विशयक प्रस्नांचेर चर्चा जाली. होंडा – सत्तरी वाठारांत हेलिकॉप्टर देखभाल आनी दुरुस्ती प्रकल्प बेगीन सुरू जातलो, अशें आस्वासन केंद्रीय संरक्षणमंत्री राजनाथ सिंग हांणी दिलां, अशें मुख्यमंत्री डॉ. प्रमोद सावंत हांणी सांगलें.
दामू नायक आनी बी.एल. संतोष हांची चर्चा
पक्षाचे राष्ट्रीय सरचिटणीस बी.एल. संतोष हांची प्रदेश अध्यक्ष दामू नायक हांणी भेट घेतली. पक्षाच्या संघटणात्मक कार्याविशीं चर्चा जाली, अशें दामू नायक हांणी सांगलें.
मंत्र्यांचे कामगिरीचेर आसतली केंद्रीय फुडाऱ्यांची नदर
राष्ट्रीय अध्यक्ष जे. पी. नड्डा हांचे कडेन संघटन तशेंच संघटन पर्वा विशीं चर्चा जाली. संघटन घटमूट करपा खातीर जनसंपर्क तशेच कार्यावळींचें आयोजन जावपाक जाय. मंत्र्यांचे कामगिरीचेर आतां केंद्रीय फुडाऱ्यांची नदर आसतली. मंत्र्यांचे कामगिरीचो नियाळ जातलो. सरकार आनी संघटने विशीं चर्चा जाली, अशी म्हायती प्रदेश अध्यक्ष दामू नायक हांणी दिली. मुख्यमंत्री डॉ. प्रमोद सावंत आनी प्रदेश अध्यक्ष दामू नायक हांणी एकठांय राष्ट्रीय अध्यक्ष जे. पी. नड्डा हांची भेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
