भांगरभूंय | प्रतिनिधी
अभिषेका खातीर गोंयचे भावीक घेतात देवदर्शनाचो लाव
वाळपय: गोंय-कर्नाटक शिमेर आशिल्ल्या चोर्ला कर्नाटक हांगासरल्या रामेश्वर देवस्थानांत श्रावणांत सामुहीक अभिषेकाचे कार्यावळीक काल (सोमारा) व्हड प्रमाणांत भाविकांनी गर्दी केल्ली.
चोर्ला हांगासरलें रामेश्वर देवूळ हें जागृत देवस्थान म्हूण फाटल्या कितल्याशाच वर्सां सावन ताची नामना आसा. दर वर्सा श्रावण म्हयन्यांत हांगा विवीध प्रकारच्यो धर्मीक कार्यावळी जायत आसतात. श्रावणांत येवपी सोमारा अभिषेकाची कार्यावळ हांगा जाता. हातूंत व्हड प्रमाणांत भावीक वांटो घेतात. अंदूं अशीच गर्दी पळोवंक मेळ्ळी.
सकाळ सावन भावीक आपले घरकान्नी सयत अभिषेका खातीर गर्दी करीत आशिल्ल्याचें दिसून आयलें. हे विशीं नागरिकां कडल्यान मेळिल्ले म्हायती प्रमाण गोंय-कर्नाटक शिमेर चोर्ला गांव आसा. हो गांव जरी कर्नाटकांत येत आसलो तरी ह्या गांवची संस्कृती पुरायपणान गोंया सारकीच आसा. हांगासरले नागरीक व्हड प्रमाणांत गोंयच्या वेगळ्यावेगळ्या वाठारांनी कामाक आसात.
दर वर्सा श्रावण म्हयन्यांतल्या सोमारा ह्या देवळांत उत्सव आसता. हांगा अभिषेक केल्यार भाविकांच्यो समस्या पयस जातात अशी अख्यायिका आशिल्ल्यान व्हड प्रमाणांत गर्दी जाता. फाटल्या खूबशा वर्सां सावन ही पद्दत रूढ जाल्या. सुरवातेक कांय मेजकेच भावीक अभिषेका खातीर देवस्थानांत येताले. पूण हाची व्याप्ती ल्हवू ल्हवू वाडूंक लागली. आयज शेंकड्यांनी भाविकांनी अभिषेकांत वांटो घेतलो. एकाच वेळार सामुहीक पद्दतीन अभिषेक करपाची परंपरा हांगा आसा.
पुरयता वरवीं हो अभिषेक करतात. प्रत्यक्षपणान शास्त्रोक्त पद्दतीन अभिषेक करपाची संद मेळत आशिल्ल्यान दर वर्सा भावीक व्हड प्रमाणांत गर्दी करतात. दनपार मेरेन शेंकड्यांनी भाविकांनी अभिषेकांत वांटो घेतलो.
मजगतीं, ह्या देवस्थानांत दर वर्सा रामनम आनी परंपरीक कालोत्सव व्हड उत्साहान जाता. ह्या वेळार हजारांनी भावीक हातूंत वांटो घेतात अशी म्हायती ग्रामस्थां कडल्यान मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
