भांगरभूंय | प्रतिनिधी
बेळगांव : नाशिकच्या एसपीं कडल्यान बेळगांव पुलिसांक ६ जानेवारीक अधिकृत पत्र मेळ्ळें. चोर्ला घाटार सुमारे ४०० कोटी रुपयांचो दरोडो/ लुटमार जाल्ल्याचो दुबाव ह्या पत्रांत उक्तायिल्ल्याची म्हायती एसपी के. रामराजन हांणी दिली.
आयतारा बेळगांवां घेतिल्ले पत्रकार परिशदेंत ते उलयताले. ह्या वेळार तांणी सांगलें, फाटल्या २२ ऑक्टोबराक संदीप पाटील नांवाच्या मनशाचें अपहरण जाल्लें. तशेंच १६ ऑक्टोबराक सुमार ४०० कोटी रुपयांची रक्कम लुटपाची म्हायती मेळ्ळी. तशेंच विशाल नायडू नांवाच्या मनशाचें नाशिकांत अपहरण जाल्ल्याचें मुखार आयलें. बेळगाव पुलिसांनी संदीप पाटीलाची चवकशी केली तेन्ना तांचें अपहरण करप्यांनी आपल्या मुखार पयशांच्या दरोड्या विशीं कबुली दिल्ल्याचें संदीप हांणी पुलिसांक सांगलें.
घटना चोर्ला घाटार घडिल्ल्यान कोणेंय कागाळ दिल्यार बेळगांव पुलीस गुन्यांव दाखल करतले. हे घडणुकेचे साक्षीदार वा पिडेस्तांनी मुखार येवन कागाळ करची असो उलो तांणी मारलो.
ह्या प्रकरणाची चवकशी महाराष्ट्र पुलीस करतात, तांकां कर्नाटक पुलीस पुराय सहकार्य करतलें. चोर्ला घाट तीन राज्यांचे शिमेर आसा. हें प्रकरण गंभीर आसा. लुटलेली रक्कम खंयच्या चलनी नोटांची, हे विशीं आजूनय पुश्टी जावंना. फुडाराक अशे तरेच्यो घडणुको परत घडच्यो न्हय म्हूण चोर्ला घाटार नवे सीसीटीव्ही कॅमेरे बसयतले अशें तांणी सांगलें.
नाशिक पोलिसांचे विशेश तपास पंगड ह्या प्रकरणाचो छडो लावपाक बेळगांवां आयलां. ह्य पंगडांत नाशिकचे अतिरिक्त पुलीस अधीक्षक तशेंच वरिष्ठ अधिकारी वाटेकार आसात. चोर्ला घांटावेल्या ४०० कोटींच्या लुटी प्रकरणांत प्रत्यक्ष सुवातेर वचून पुरावे, साक्षीदार आनी संबंदीत व्यक्तींची चवकशी करतले. बेळगाव पोलिसां कडेन समन्वय सादत संयुक्त तपासाक वेग दितले अशे संकेत तांणी दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
