भांगरभूंय | प्रतिनिधी
विवेकानंद पर्यावरण फौजेन मनयलो ‘पुष्पोत्सव’
भांगरभूंय । प्रतिनिधी
केरी- सत्तरीः अस्तंत घांटाची प्रदेशनिश्ट वनस्पत आशिल्ली आनी सात वर्सांनी फुलपी कारवी वनस्पत चोर्लां घाटांत फुलपाक सुरवात जाल्या. हे वनस्पतीची म्हायती दिवपा खातीर विवेकानंद पर्यावरण फौज केरी सत्तरी वतीन ‘कारवी पुष्पोत्सव’ हालींच चोर्ला घाटांतल्या म्हादय संशोधन केंद्राच्या वाठारांत घडोवन हाडिल्लो. सुमार शंबरेक पर्यावरण मोगी, सैम अभ्यासक आनी विद्यार्थ्यांनी हाजेरी लावन कारवीची म्हायती आनी ताचें म्हत्व समजून घेतलें.
ह्या वेळार ज्येश्ठ पर्यावरण मोगी राजेंद्र केरकार, वनस्पतशास्त्र अभ्यासक आनी हरमलच्या गणपत पार्सेकार म्हाविद्यालयाचे सहाय्यक प्राध्यापक अक्षता फर्नांडीस तशेंच हेर वनस्पत अभ्यासकांनी कारवी फुलांच्या जीवनचक्राची म्हायती दिली. अर्दो दीस चलिल्ले हे कार्यावळींत खूब जाणांनी चोर्ला घांटाच्या वाठारांत सैम भोंवडी करून कारवीची सोबितकाय काळजांत सांठयली.
रानाची धूप आडावपाक योगदानः अक्षता
रानाची धूप आडावपाक आनी पालसणां कोसळपा पासून आडवचे खातीर कारवीचीं झाडां म्हत्वाचें काम करता. ते खातीर तिचें संवर्धन गरजेचें आसा, अशें अक्षता फर्नांडीस हांणी सांगलें.
अस्तंत घाटाचे वनस्पत वैविधतेंत कारवी वनस्पतीक व्हड सुवात आसा. ह्या रानांत पांच तरांच्यो कारवी प्रजाती मेळटात. तातूंत सात वर्सांनी फुलपी कारवीक म्हत्वाची सुवात आसा. सात वर्सांनी फुल्ले उपरांत तांकां बियो येतात आनी उपरांत ती वनस्पत मरता. ते परांत सात वर्सांत ती वाडटा आनी परतून फुलता. आपल्या जीवनचक्रांत एकदांच फुलपी ही वनस्पत आसा, अशें तांणी सांगलें.
कारवीच्या पानांचेर अस्तंत घांटांत मेळपी थळावे फुलपाखे, किडी रावतात. ती फुल्ले उपरांत सुकणी, म्होवा मूस, किडी हांचे खातीर ती अन्न पुरवण करता, अशेंय फर्नांडीस हांणी सांगलें.
लोकजिणेंत कारवी म्हत्वाचीः केरकार
राजेंद्र केरकार हांणी लोकजिणेंतलें कारवीचें म्हत्व स्पश्ट केलें. आदलो समाज आपले खोंपीचें पांखें आनी खोंपीक सरभोंवतणी पारेत उबारचे खातीर कारवीच्या बडयांचो वापर करताले. तशेंच कारवी फुल्ले उपरांत म्होवाचीं पोळी वाडटात. तीं काडपा खातीर आदीं लोक वताले, अशेंय तांणी सांगलें.
लक्ष्मी झर्मेकांर हांचो भोवमान
ह्या महोत्सवा वेळार जाल्ल्या ल्हानश्या सुवाळ्यांत सुर्ला सत्तरीची ज्येश्ठ लोकगायिका आनी रानांतले लोकजिणेची जाणकार लक्ष्मी नागेश झर्मेंकार हांचो राजेंद्र केरकार हांचे हस्तुकीं णववारी कापड आनी सन्मान पत्र दिवन भोवमान केलो. ह्या वेळार म्हादय पर्यावरण जागृती फौजेचे अध्यक्ष चंद्रकांत शिंदे हाजीर आसिल्ले. तांणी प्रास्तावीक केलें जाल्यार विठ्ठल शेळके हांणी सुत्रसंचालन केलें.
कारवी फुल्लीं आठ वर्सांनी !
अंदूं चोर्ला घांटार आठ वर्सांनी कारवी फुल्लीं. फाटले खेपे 2016 त ती ह्याच काळांत फुलिल्ली. सात वर्सांनी फुलपी कारवी 2023 त फुलतली अशीच अपेक्षा पर्यावरण मोगींची आशिल्ली. सात वर्सां पुराय जाले उपरांत आठव्या वर्सा ती फुलता, असो अदमास पर्यावरण मोगींचो आशिल्लो. पोरूं मेळावली- गुळेली वाठारांत कारवी फुलिल्लीं जाल्यार 2022 त ती निरंकालांतल्या रानांत फुलिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
