भांगरभूंय | प्रतिनिधी
पणजी : चोर्ला घांटार कोसळिल्ल्या पालसणां कुशीकच्यान वाट काडटना एक ट्रक खोल देंगणांत पडलो. मंगळारा सकाळच्या सुमार ६.३० वरांचेर ही घडणूक घडली. हो प्रसंग वळखून ट्रक चालकान वेळार भायर उडी मारून आपलो जीव वाटयलो. हे घडणुकेक लागून सध्या चोर्ला घांटावेली येरादारी ठप्प जाल्या.
चोर्ला घांटार पालसणां कोसळून रस्त्यार माती आनी फातर आयिल्ल्यान वाहनांक मुखार वचपाक मेळना. हे विशींचे घडणुकेची म्हायती मेळटांच वाळपय पुलीस, उजो पालोवपी दळ आनी हेर रेस्क्यू टीम घडणुके सुवातेर पावल्या.
सध्या चोर्ला खोल देंगणांत पडिल्लो ट्रक काडपाचे आनी रस्तो मेकळो करपाचे यत्न चालूच आसात. मजगतीं, घाट मार्गार पालसणां कोसळपाच्यो घडणुको घडतूच आशिल्ल्यान प्रवाशांनी जतनाय घेवपाचो उलो मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
