भांगरभूंय | प्रतिनिधी
का णकोण ते पणजे मेरेन सरकारी सुवाळ्यांचे, कार्यावळींचे फोटे काडत व्हड जावपी, प्रसंगार पुलिसांचे दांडे खावपी फोटोग्राफर म्हळ्ळ्यारच सोयरू कोमारपंत.
सोयरुचो गोंय मुक्तीदिसाच्या सुवाळ्यांत अंदुं भोवमान जातना ताच्यो भगल्यो मारपी आसचे नात अशें न्हय. सोयरुक हांवें लागीं सावन पळेला, ताच्या वावराची वळख म्हाका आसा. समाजीक, वेवसायीक वावरा खातीर ताका हे आदीं भोवमानय मेळ्ळ्यात. गोंय मुक्ती दिसाच्या मुखेल सरकारी सुवाळ्यांत ताका मेळपी भोवमानाक व्हड मोल आसा.
सोयरुचे फोटो, वावर समाज, राजकारणाचे शिमेंतलो न्हय, ताणें देस पावंड्यावेल्या थळांचे सुंदर फोटो काडल्यात, निसर्ग रुपांतल्या ताच्याय फोटोक इनामा मेळ्ळ्यांत. सोयरु लोकलढ्यांनी, आंदोलनांनी वांटो घेवपी, पुलिसांक चोरांक धरपाक मजत करपीच न्हय तर पत्रकारांच्या आंदोलना वेळार मडगांवा सावन पत्रकारांक घेवन येवपी. मागासवर्ग आयोगाचो वांगडी म्हणून तो वावुरला, पंचायत ते नगरपालिकेच्या राजकारणांतय तो दिसला. आपले घरकान्नीक नोकरी करपाक
बळगें दिवपी सोयरुन दक्षीण गोंयांत पत्रकार दुयेंत पडल्यार तांचे खातीर वर्गणी एकठांय केल्या, शिस्तीन सरकारा कडेन मजतय मागल्या.
मडगांवां पुलीस लाठीचार्ज करतना फोटो काडपाक सोयरु अनमनलो ना, ताणें दांडे खाले. तो हाॅस्पिटलांत आसतना पत्रकारच न्हय गुरुनाथबाब केळेकार हांचे सारके स्वातंत्र्यसैनिक, हेर ताचे खातीर मोर्चात येवपाक फुडें सरले. ताचेर जाल्ल्या लाठीचार्जाची चवकशी करपाक आयोग नेमपा खातीर पत्रकार फाटल्यान लागले. आतांचे आयएएस अधिकारी स्वप्निल नायक हांचे चवकशेंतल्यान ताका न्याय मेळ्ळो. पुलीस अधिकारी सुनिता सावंत हांणीं दोनापावलाच्या पुलीस ठाण्यात फोटोंच्या आदारान ताचेर दांडे कशे पडले तें स्पश्ट पळयले उपरांत अहवाल धाडलो. ताका जबर मार बशिल्लो, पूण तातूंतल्यान तो साल्वार जालो. पुलिसांक गुप्त माहिती दिवपी, सरकारी समितीचेर पावपी सोयरुन आपल्या समाजाच्या हेर मळांनीय काम केलां. ते खातीर समाजान, संघटनांनी, पुलिसांनी ताचो सत्कारय केला.
काणकोणांतल्यान मडगांव मेरेन येवन शारांतल्या लोकांत भरसून वचप, पत्रकारिता करप सोपें नासता. ज्या तेंपार येरादारीचीं उणाव आशिल्लो तेन्ना मडगांव मेरेन आयलो, उण्या पगारांतल्यान नवें कितें तरी शिकत रावलो. युवा पुरस्कार जोडपी, समाज वेसनमुक्त जावचो म्हणून जागृताय करपी, बातम्यो फोनावेल्यान पावोवपाकय फाटीं पडलो ना.
कंत्राटावेले नोकरेंत आसतनाय आपसुवार्थ पयस दवरुन कामांत रावन समाजसेवा करपाक येता, फोटोंतल्यान समाज सुदारप शक्य आसा तें ताणे दाखोवन दिलां. फुडेंय ताका जैत मेळूं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
