भांगरभूंय | प्रतिनिधी
शिंपणावळ खात्याच्या अधिकाऱ्यांनी केली पळोवणी
भांगरभूंय । प्रतिनिधी
पेडणें: चोपड्यां दोंगराच्या माथ्यार सर्वे नं. 17 (1) जमनीर खणिल्ल्या बोरवॅलींची आगरवाडो चोपडें नागरीक समितीन शिंपणावळ खात्याच्या अधिकाऱ्यां सयत बिरेस्तारा 5 सप्टेंबराक पळोवणी केली.
चोपड्यां दोंगरमाथ्यार बोरवॅल मारिल्ल्याची कागाळ आगरवाडो चोपडें नागरीक समितीन 26 ऑगस्टाक शिंपणावळ खात्या कडेन केल्ली. ते प्रमाण खात्याचे अधिकारी फाटल्या सप्तकांत थंय खरेंपण पळोवपाक केल्ले. पूण थंय गेट बंद आशिल्ल्यान ते परतून गेल्ले. ते उपरांत शिंपणावळ खात्याच्या अधिकाऱ्यांनी संबंदीत ब्रह्मा कंपनीक नोटीस जारी केल्ली. ते प्रमाण परतून बिरेस्तारा 5 ऑगस्टाक आगरवाडो चोपडें नागरीक समितीच्या पदाधिकाऱ्यां वांगडा पेडणें शिंपणावळ खात्याचे वरिश्ठ अभियंते परुळेकार हांणी त्या वाठाराक भेट दिली. त्या वेळार थंय 2- 3 बोरवॅल मारिल्ल्याचें दिसलें. प्रत्यक्षांत तातूंतली एकूच बोरवॅल चालू आशिल्ल्याचेंय तांच्या लक्षांत आयलें. तशेंच ते जमनीर बांदकाम करपाक पंचायतीन 2019 त एकल्याक परवानगी दिल्ल्याचें सांगतात, मात प्रत्यक्षांत थंय दोन कडेन पक्की बांदकामां केल्यांत. उदक व्हांवून वचपा खातीर आशिल्ले व्हाळ पुरोवन तातूंत उदकाची पायपलायन घातिल्ल्याचें नागरीक समितीचे नदरेक पडलें. थंय आनीक पक्की बांदकामां उबारपाच्यो हालचाली दिसतात. ते नदरेन थंय विजेची वेवस्था केल्या. थंय ट्रान्सफोर्मर उबारला, तशेंच वीज पुरवण करपा खातीर वीज सरयो लेगीत हाडून उडयल्यात, अशें नागरीक समितीन म्हणलां. ह्या प्रकरणांत थळावी पंचायत, आमदार जीत आरोलकार हांणी लक्ष घालचें, अशी मागणी आगरवाडो चोपडें नागरीक समिती वतीन अध्यक्ष विवेक गांवकार आनी आगरवाडो चोपडें पंचायत वाठारांतल्या लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
