भांगरभूंय | प्रतिनिधी
पेडणें: आगरवाडो चोपडें पंचायत वाठारांत चोपडें पुला लागसारच्या शापोरा न्हंये देगेर व्हड प्रमाणांत कांदळी आसात. थंय जेसीपीचो वापर करून मातयेचो बेकायदो भराव घालतात, अशी कागाळ थळाव्या लोकांनी पंचायत आनी पेडणें रान विभागाक दिली. ते उपरांत आगरवाड्याचे सरपंच अँथनी फर्नांडीस आनी रान खात्याच्या अधिकाऱ्यांनी ताकतिकेन घडणुकेचे सुवातेचेर येवन पळोवणी केली. थंय पंचनामो केलो आनी अज्ञात मनशा आड गुन्यांव नोंद केलो.
चोपडें पुला लागसार शापोरा न्हंयेदेगेर एका हॉटेल वाठारांत व्हड प्रमाणांत कांदळी आसात. ताका जोडुनूच व्हड प्रमाणांत मातयेचो भराव घालून बांदकाम करपाची तयारी चल्ल्या. हे आदींय त्या हॉटेल संबंदितांनी थेट भौशीक बांदकाम रस्तो विभाग जमनीचेर अतिक्रमण करून थेट राखणे वणटी कडेन बांदकामां केल्ल्याचेंय मुखार आयिल्लें. भौशीक बांदकाम खातें रस्तो विभागान आपली जमीन आरक्षीत करूंक नाशिल्ल्यान आनी रस्त्याचे कुशीक राखणे वणत घातिल्ली. ते राखणे वणटीक जोडुनूच बांदकाम केलां. ताचे कडेन सरकारा कडेन पुराय आडनदर जाल्ल्यान ह्या वेवसायिकांचें आयतेंच फावलां. आतां त्याच हॉटेलाचे कुशीक एका वेवसायिकान व्हड प्रमाणांत मातयेचो भराव घालून कांदळीं मातयेच्या भरावा पोंदा घालपाचो यत्न केल्ल्याचो दावो थळाव्या लोकांनी केला.
सरपंच अँथनी फर्नांडीस हांणी हे विशीं म्हायती दितना सांगलें, कांदळी मारतात अशी खबर मेळटाच आपूण स्वता रान विभागाक म्हायती दिले उपरांत रान विभागाचे अधिकारी घडणुकेचे अधिकारी घडणुकेचे सुवातेर हाजीर जाले. आपुणूय थंय हाजीर आशिल्लो. पूण हे घडणुके मजगतीं, कांदळी मारिल्ल्यो खंयच दिसूंक नात, पूण मातयेचो भराव घातला. ताचेर योग्य ती कारवाय करतले. तशेंच ती माती कोण घालता, ताचीय म्हायती मेळयतले, अशें तांणी सांगलें.
गुन्यांव नोंद करतलेः नायक
कांदळी मारिल्ल्याचें दिसूंक ना, मात कांदळींचे कुशीक व्हड प्रमाणांत मातयेचो भराव घातला. हे संबंदांत अज्ञात व्यक्ती आड गुन्यांव नोंद करतले, अशें रान विभागाचे अधिकारी जितेंद्र नायक हांचे कडेन संपर्क केलो तेन्ना तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
