भांगरभूंय | प्रतिनिधी
कांय दीस त्रास सोंसात: ग्रामस्थ आनी आमदाराची जाली जोड बसका
दिवचल: चोडण रायबंदर रोरो फेरी प्रस्नाचेर सरकार योग्य तोडगा काडटलें. जल मार्गा वेल्यान नेमान प्रवास करपी प्रवाशांक जावपी त्रास पयस करचे खातीर सरकारान ह्या मार्गार रो-रो फेरी बोटी सुरू केल्यात. मात हे विशीं कांय जाणांनी विवीध प्रस्न हजर केल्यात. तरी थळाव्यांनी १५ ऑगस्ट मेरेन धीर धरचो. हे विशीं योग्य तोडगो आनी सगले प्रस्न निकालांत हाडटले अशी हमी आमदार प्रेमेंद्र शेट हांणी दिली.
शेनवारा आमदार तशेंेच चोडण पंचायत मंडळ, ग्रामस्थ हांचे जोड बसकेंत विवीध प्रस्न चर्चेक आयले. सरकारन एक म्हयनो अभ्यास करून उपरांतूच तातूंतल्यो चुको आनी लोकांच्यो अपेक्षा हे विशीं निश्चीत तोडगो काडचो, अशी हमी आमदारान ह्या वेळार दिली.
मुख्यमंत्री डॉ प्रमोद सावंत, न्हंय परिवहन खात्याचे मंत्री सुभाष फळदेसाय आनी रो रो फेरीबोटी सुरू करपाक म्हत्वाचो वाटा आशिल्ले मयेंचे मतदार संघाचे आमदार प्रेमेंद्र शेट आनी हेरांनी विशेश यत्न केल्यात.
१४ जुलय २०२५ दिसा रो-रो फेरी बोटींचे उक्तावण कार्यावळीक नहंय परिवहन खात्याचे मंत्री सुभाष फळदेसाय हांणी रो रो फेरीबोटी सुरू जाले उपरांत जलमार्गावेले येरादारीचो एका म्हयन्या उपरांचो आढावो घेतले. आयज उक्तावणाक कांय दीस जातात. आजूनय आठरा दीस उरल्यात. सध्या जलमार्गावेल्या तिकेट दरा विशीं विवीध चर्चा चल्ल्यात. चड करून चोडणेच्या नागरिकांक विवीध गजालींचेर सूट जाय. न्हंय परिवहन मंत्र्यांनी जाहीर आस्वासन दिल्ल्यान आमी एक म्हयनो वाट पळोवपाक जाय. नाका जाल्ल्या चर्चांचेर लक्ष दिवचें न्हय. एक म्हयनो म्हळ्यार १५ ऑगस्ट मेरेन वाट पळोवया. तो मेरेन खंयच्याच वायट प्रचाराक बळी पडूं नाकात, असो उलो आमदार शेट हांणी मारलो.
गैर वेवस्थास पयस करपाक ही सेवा सुरू केल्या. हाका लागून १५ ऑगस्ट मेरेन विवीध गजालींचेर अभ्यास करून सगल्या प्रस्नांचेर उपाय काडटले. आपूण स्वता चोडणीचें शिश्ट मंडळ घेवन मुख्यमंत्र्यांक कडेन चर्चा घडोवन हाडटलों अशेंय आमदार शेट हांणी ग्रामस्थ तशेंच पंचायत मंडळा कडेन स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
