चोडण फेरीबोट घडणुके वेल्यान कॉंग्रेसीचो न्हंय येरादारी खात्याक घेराव

भांगरभूंय | प्रतिनिधी

पणजीः चोडण फेरीबोट घडणुके वेल्यान कॉंग्रेसीच्या कार्यकर्त्यांनी न्हंय येरादारी संचालक विक्रम राजे भोसले हांकां घेराव घालो. प्रवाश्यांची सुरक्षा आनी फेरीबोटींचे देखरेखी कडेन आडनदर करुन सगल्यो जेटी कॅसिनोंच्या फायद्या खातीर दिल्ल्याचो आरोप ह्या वेळार कॉंग्रेशीचे गोंय प्रदेशाध्यक्ष अमित पाटकार हांणी केलो.
बुधवारा पाटकार हांच्या फुडारपणा खाला कॉंग्रेशीचे पदाधिकारी, कार्यकर्ते आनी हेर वावुरप्यांनी कॉंग्रेस हावसाकडल्यान मोर्चाक सुरवात केली आनी पणजे फेरी धक्यार येवन सगल्यांनी फेरीबोटींत प्रवास करून बेती गेले. फेरयेंतल्यान देंवले उपरांत तांणी बेती न्हंय येरादारी खात्या कडेन मोर्चा व्हेलो. पुलिसांनी तांकां सुरवातेक आडयले. मात तांकां भितर सोडले उपरांत तांणी संचालक विक्रम राजे भोसले हांकां घेराव घालून जाब विचारलो. मागीर कॉंग्रेशीच्या कार्यकर्त्यांनी फेरी बोटीच्या वर्कशोपांत घुसपाचो यत्न केलो. मात पुलिसांनी तांकां आडावन परत धाडले.
न्हंय येरादारी मंत्री सुभाष फळदेसाय म्हणटात, तांकां चिल्लर खातीं दिल्यांत. पुराय गोंयभर ३० फेरी आसात आनी ३० हजार प्रवासी दर दिसा तातुंतल्यान यो-वच करतात. ह्या लोकांक मंत्री फळदेसाय चिल्लर म्हणटा काय कितें? असो प्रस्न पाटकार हांणी केलो.

पावस पडलो आनी फेरींत उदक गेलें अशें बेजबाबदार वक्तव्य संचालक दिता. जर पावसाच्या उदकांत फेरी बुडटा, जाल्यार फेरीचे रचनेत गंभीर त्रुटी आसात. पांच फेरी बोटी ह्या मार्गार तैनात केल्ल्यो. मात तातुंतले एकूच फेरयेक पावस लागलो? उरिल्ले फेरयेक पावस लागूंक ना काय असो प्रस्न पाटकार हांणी करून जे अधिकारी उंचेल्या पदार बसतात तांणी असलीं बेजबाबदार वक्तव्यां करचीं न्हय, असो सल्लो दिलो.
हो भ्रश्टाचाराचो घोळ. तो लिपोवपा खातीर समान्य कर्मचारी आसात तांचेर खापर फोडपाचो यत्न चल्ला. हांणी बोटींचें स्ट्रक्चरल आॅडीट करूंक ना आनी बंदर कप्तान खातें हांकां सरळ सर्वेक्षण प्रमाणपत्र दिता, असो आरोप पाटकार हांणी केलो. अंतर्गत न्हय येरादारी कायद्या प्रमाण फेरी खातीर आयरआएस दाखलो जाय. मात हें सरकार करिना. बंदर कप्तान खात्याचे मरीन सर्वेक्षक हें कंत्राटी तत्वाचेर आसा हें सर्वेक्षकांक फाल्यां काडले आनी कितेंय वायट घडणूक घडली जाल्यार जापसालदार कोण? असोय प्रस्न पाटकार हांणी केलो.
सरकार लोकांच्या सुरक्षे बाबत गंभीर ना. लोकांचे सुरक्षेच्या नदरेन आमी बंदर कप्तान खात्याक बरोवन सगळ्यो फेरी आयआरएस प्रमाणीत करपाक सांगतले. ते भायर आमी उजो पालोवपी यंत्रणेचो अहवाल मागला. मात अजून मेरेन तो येवंक़ ना. आमी हो विशय विधानसभेंत मांडटले. तांणी आपल्यो स्वताच्यो जेटी काडून कॅसीनोंक दिल्यात. तातुंतल्यान १४०० कोटी इतली येणावळ खात्याक येता. हे फकत भ्रष्टाचार करपाक पेटल्यात आनी गोंयकारांचें सुरक्षेचे कायच पडिल्लें ना, असो आरोप पाटकार हांणी केलो.