भांगरभूंय | प्रतिनिधी
– 18 कुळांचो/ धनयांचो सोद लागना
– 28 हजार चौमि जमीन संपादीत जातली
– 14 हजार चौमि जमीन संपादीत जाली
भांगरभूंय । गणेश जावडेकार
पणजी : जांच्या नांवाचेर जमनी आसात, त्या धनी वा कुळांचो पत्तो मेळानाशिल्ल्यान चोडण – साल्वादोर द मुंद पुला खातीरची भूंय संपादनाची प्रक्रिया आडखळल्या. पुला खातीर 28 हजार चौखण मिटर जमीन संपादीत करपाचें उद्दीश्ट आसा. तातूंतली 14 हजार चौखण मिटर जमीन संपादीत जाल्या. आतां मेरेन जमनीच्या 18 कुळांचो/ धनयांचो पत्तो मेळना. तांचो सोद घेवप सुरू आसा, अशी म्हायती गोपांनी दिली.
चोडण – साल्वादोर द मुंद पुलाची मागणी बरीच पोरणी आसा. चोडण, नार्वें, मयें तशेंच दिवचल वाठाराच्या लोकांक हो पूल लाबकारी थारतलो. तशेंच चोडण – रायबंदर फेरीबोट सेवे वयलो कोट्यांनी रुपयांचो सरकाराचो खर्च वाटावतलो. हाका लागून हो पूल गरजेचो थारता.
मयेंचे आमदार प्रेमेंद शेट हांच्या फुडाकारान मुख्यमंत्री डॉ. प्रमोद सावंत हांणी शुक्रारा मंत्रालयांत बसका घेतली. पुला खातीर भूंय संपादन जावप गरजेचें आसा. भूंय संपादन जाले उपरांत आराखडो तयार करून निविदा जारी करप शक्य जातलें. हाका लागून भूंय संपादनाचेर प्राधान्यान लक्ष दिवपाचें बसकेंत थारलां. चोडण – साल्वादोर द मुंद हो 200 मिटर लांबायेचो पूल आसतलो. चोडण, साल्वादोर द मुंद आनी लागसारच्या वाठारांतली मेळून 28 हजार चौखण मिटर जमीन लागतली. भूंय संपादनाची प्रक्रिया सुरू जावन धा वर्सां जावन गेली. आतां मेरेन निम्मे म्हणस्यार 14 हजार चौमि जमनीचें संपादन जालां. निम्या जमनीचें संपादन उरलां. जमनीच्या एक चौदाच्या उताऱ्याचेर जांचें नांव लागलां, तातूंतल्या कांय कुळांचो पत्तोच लागना. जमनीचे कांय धनी गोंयांत नात. कांय धनयांक मरण आयिल्ल्यान तांच्या वारसांचो सोद घेवप गरजेचें थारता. हो प्रस्न सुटावो जावपा खातीर महसूल सचीव संदीप जॅकीस हांच्या फुडारपणा खाला सराकारान समिती स्थापन केल्या.
कायदो खर जाल्ल्यान आडखळी वाडल्योः शेट
मयेंचे आदले आमदार सर्गेस्त अनंत शेट हांणी फुडाकार घेवन भूंय संपादन प्रक्रिया सुरू केल्ली. 2017 ते 2022 ह्या काळांत पुला विशीं कसलेच सोपस्कार जाले नात. आमदार ह्या नात्यान भूंय संपादन प्रक्रियेची फाटपुरवण आपणे सुरू केल्या, अशें मयेंचे आमदार प्रेमेंद शेट हांणी सांगलें. 2014 त भूंय संपादन कायदो खर जाल्ल्यान आडखळी आनीक वाडल्यो, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
