भांगरभूंय | प्रतिनिधी
झारखंड, खबरां संस्था ः सैमांत जायतीं जनावरां आनी सुकणीं आसात. कांय जनावरां आनी सुकणीं हांचे कडेन दुर्लक्ष जाता. कांय विलुप्त लेगीत जाल्यात. चोंचींत ११ लिटर उदक भरून ५० किमी वेगान उडपी सुकणें आतां दिसलां. झारखंडांतल्या साहिबगंज जिल्ह्यांत हें सुकणें दिसून आयलां. स्पॉट बिल्ड पेलिकन हें सुकणें रान खात्याच्या कर्मचाऱ्यांक दिसलें. हें सुकणें भारतांतल्या गुजरात, तमिळनाडू आनी आंध्र प्रदेशांत रावता.
स्पॉट बिल्ड पेलिकन सुकणेंचे खाशेलपण…
स्पॉट बिल्ड पेलिकन हें मांसाहारी सुकणें. हें नुस्तें आनी ल्हान उदकांतले जनावर खाता. तें ताची लांब चोंच नुस्तें धरपा खातीर वापरता. ताचे चोंच सकयल एक पोती आसता. तातूंत ११ लिटर उदक सांठोवंक मेळटा. वरांक 50 किमी वेगान हें सुकणें उडपाक शकता. पेलिकन सुकणें हें सगळ्यांत व्हडलें सुकणें अशें मानतात. तांची लांबाय १२५ ते १५० सेंमी आनी पांखे २.५ मीटर इतले आसा. ताचें वजन ४ ते ६ किग्रॅ इतले आसता. ताचीं पाखां धवीं आसतात. ताचेर तकलेर तपकिरी- काळ्या रंगाचें मुकुटा सारकें चिन्न आसता. तशेंच कपलाचेर एक खाशेलें हळडुवें रंगाचे चिन्न आसता.
आशियांतल्या दलदली वाठारांनी हों सुकणें मेळटा. सद्या पेलिकन हें सुकणें विलुप्त जावपाचे वाटेर आसा. आययूसीएनच्या (IUCN) च्या रेड लिस्टांत ‘निअर एन्डेंजर्ड’ म्हणून ताची वळेरी आसा. शिकार आनी प्रदुशणाक लागून पेलिकन सुकण्याची रावपाची सुवात उणी जायत आसा.
भारत आनी श्रीलंका सयत दक्षीण पूर्व आशिया, कंबोडिया, लाओस, थायलंड आनी व्हिएतनाम हें सुकणें मेळटा. न्हंयो, तळीं, घसघसे आनी दलदली आशिल्ल्या वाठारांनी हें सुकणें रावता. ह्या सुकण्याचें मांस, पिसां आनी चोंच हांचे खातीर ताची शिकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
