भांगरभूंय | प्रतिनिधी
अग्रलेख बी ते डिक्टेट करताले. एकाच वांगडा एकट्याक लेख आनी आनी दुसऱ्याक अग्रलेख डिक्टेट करी. तांची ती कळाशी पळोवपा सारखी आसताली. राग आयल्यार ते तांबडेगूंज जाताले. कामांत घाळपणां तांकां मात्तूय मानवनासलीं.
गोंयचे एक म्हान लेखक, पत्रकार, संपादक आनी कोंकणी चळवळींतले म्हालगडे सर्गेस्त चंद्रकांतबाब केणी हांची आयज जयंती. तांचो जल्म 26 नोव्हेंबर 1934 दिसा जालो. ओपिनीयन पोल, कोंकणीक साहित्य अकादेमीची मान्यताय, राजभास आंदोलन ह्या सगल्या चळवळींतले ते एक खडेगांठ फ़ुडारी आनी चैतन्यदायी झुजारी. तांणी आपलें पुराय जिवित गोंय, गोंयकारपण आनी कोंकणीक ओंपलें. तांकां सगळे जाण ‘केणीबाब’ म्हूण आदरान उलो मारताले. तांकां सहसा परत प्रस्न विचारपाची कापाज्दाद कोणाक जाय नाशिल्ली. साहित्यकार आनी पत्रकार म्हूण तांचो संपर्क दिल्लींत मोट्या मोट्या मानेस्तां कडेन, संस्था, मंत्रालयां हांचे कडेन आशिल्लो. तांणी थंय आदराची सुवात जोडिल्ली.
स्पश्टवक्तेपण हो तांचो सगळ्यांत व्हडलो गूण. ते केन्नाच रिटायर जाले नात. जिविताच्या निमणे पांवड्यार लेगीत ते बरयत आसले. एक ध्येयवादी पत्रकार, त्याच वांगडा ते कोंकणी, मराठी, हिंदी आनी इंग्लीश भासांतले एक उत्कृश्ट लेखक. तांची भाशा सोंपी, स्पश्ट आनी विचारांक चालना दिवपी आशिल्ली. तांचे वेळावेल्या तरणाट्या पत्रकारांक ते एक दीपस्तंभा सारके उजवाड दिवपी मार्गदर्शक आसले. आयज जीं पत्रकारतेच्या मळार कांय नांवां गाजतात तांचे गुरु हे केणीबाब आसले.
ते प्रखर गांधीवादी आसले. पिरायेच्या चवदाव्या वर्सा तांणी राष्ट्रवादी चळवळींत उडी मारली, जेन्ना तांणी दक्षीण गोंयांतल्या कोलवा हांगासर गांधीजींच्या अस्थिकलशाच्या विसर्जनावेळार आपलें पयलें प्रेरक भाशण केलें.
कोंकणी भास आनी चड करुन कोंकणी साहित्य हातूंत स्वताक पुरायपणान समर्पीत केल्ले केणीबाब हांणी कोंकणीक साहित्य आकादेमीची मान्यताय मेळोवपाक मोलाचो हातभार लायलो. पूण आयच तांचे हें योगदान सगळेच विसरल्यात हाचें वायट दिसता. तांणी ‘राष्ट्रमता’ वरवीं तरणाट्या कोंकणी लेखकांची एक फौज तयार केली. आयज जे प्रस्थापित लेखक कोंकणीचे मळार दिसतात तांकां उर्बा आनी मार्गदर्शन दिवपी हे केणीबाब आसले.
केणीबाब हे दोन तरांचें लिखाण करताले. एक संवेदनशील कथालेखक आनी दुसरे एक प्रखर पत्रकार म्हूण. तांकां कथा हो प्रकार खूप आवडटालो. तातूंत तांचे संवेदनशील मनाचो दिश्टावो जातालो. कथिका हो प्रकार तांणी कोंकणींत हाडलो आनी तो रुजयलो. ‘मनोगत’ हें राष्ट्रमतांत येवपी तांचें कथात्मक सदर गाजलें. सगळे दर आयतारा ह्या सदराची उमळशीकेन वाट पळयताले.
तेन्ना ‘अ व्हीद’ हे पुर्तुगेज दिसाळें जातूंत म्हजो बापूय काम करी, फेलिस्यु कार्दोज हांचे ‘सत‘ आनी ‘राष्ट्रमत’ हांच्यो कचेऱ्यो बड्ड्या- मडगांव हांगा लागीं- लागीं आसल्यो. चंद्रकांत केणी, फेलिस्यु कार्दोज हे म्हजे बापायले आमीग. 1971 वर्सा हांवें मेट्रीकेची परिक्षा दिली. रिजल्ट ये मेरेन एक म्हयनो सुटी आसली. केणीबाबान म्हज्या बापायक म्हाका ‘राष्ट्रमतां’त धाड म्हण सांगलें. एक म्हयनो हांवें केणीबाब, जनार्दन फळदेसाय हांकां काम करतना लागींच्यान पळयले. तेन्ना पीटीआयच्यो इंग्लिशींतल्यान बातम्यो येताल्यो. पीटीआयचें ऑफिसूय आमचे घरा तेंकूनच आसलें. केणीबाब त्यो बातम्यो वाचून जाय त्यो कापून मराठींत करपाक वांटून दिताले. अग्रलेख बी ते डिक्टेट करताले. एकाच वांगडा एकट्याक लेख आनी आनी दुसऱ्याक अग्रलेख डिक्टेट करी. तांची ती कळाशी पळोवपा सारखी आसताली. राग आयल्यार ते तांबडेगूंज जाताले. कामांत घाळपणां तांकां मात्तूय मानवनासलीं. एक म्हयनो कसो गेलो तें म्हाका कळ्ळेंच ना. त्या एका म्हयन्यांत म्हाका खूप कितें शिकूंक मेळलें. उप्रांत हांव कितलेशे फावटीं तांचे घरा मेळूंक गेलां.
केणीबाबाचीं कोंकणी, मराठी, हिंदी आनी इंग्लिश मेळून साठां वयर पुस्तकां उजवाडाक आयल्यांत, तांचे ‘व्हंकलपावणी’ ह्या कथासंग्रहाक केंद्रीय साहित्य अकादेमीचो 1988 वर्साचो पुरस्कार लाबलो. तांका ‘सात पागलां आकाशमानान’ ह्या कुंदनीका कपाडीया हांच्या गुजराती कादंबरीच्या ‘सात पावलां मळबांत’ ह्या कोंकणी अणकारा खातीर 2001 वर्साचो पुरस्कार मेळ्ळो. तांणी ‘राष्ट्रमता’चे संपादक आनी उप्रांत कोंकणींतलें पयलें खबरांपत्र ‘सुनापरांत’ हाचे संपादक म्हण काम पळयलें. 3 फेब्रुवारी 2009 दिसा केणीबाबाक मरण आयलें.
तांचे जयंती निमतान तांचे बरे मागते आनी तांचे खाला काम करपी पत्रकार हांणी एक पुरस्कार तांच्या नांवान दवरला. हो पुरस्कार चंद्रकांत केणी हांच्या पत्रकारितेच्या आनी समाजीक वावरांत तांकां आदार दिवपी विशिश्ट व्यक्तींक दितात. ह्या प्रतिश्ठीत पुरस्काराचें हें चवथें वर्स. हाचे आदीं हो पुरस्कार ज्येश्ठ पत्रकार उदय भेंब्रे, सुरेश वाळवे आनी प्रमोद प्रभुगांवकार हांकां मेळ्ळा.
अंदूंचो चंद्रकांत केणी पत्रकार पुरस्कार ज्येश्ठ पत्रकार धर्मानंद कामत हांकां जाहीर जालां. धर्मानंद कामत हांकां पत्रकारितेचो 50 वर्सांचो अणभव आसा. राष्ट्रमत, वॅस्ट कोस्ट टायम्स ह्या दिसाळ्यांचे प्रतिनिधी, पुढारीचे दिल्ली ब्युरो चीफ म्हूण 25 वर्सा जाल्यार ओमान ‘डेली ऑब्जर्व्हर’ ह्या दिसाळ्या खातीर तांणी काम केलां. प्रिंट, रेडिओ आनी टिव्ही माध्यमांचो व्हड अणभव आशिल्ले धर्मानंद हांणी देशभरांतल्या माध्यमां खातीर स्तंभलेखन केलां. तशेंच दिल्लींत आशिल्ल्या गोंयकारांच्या वेगवेगळ्या संघटनांचे ते पदाधिकारी आसा.
हो पुरस्कार 26 नोव्हेंबराक सांजवेळा 4.30 वरांचेर पणजेच्या सरस्वती मंदिर इमारतींतल्या फोमेंतो सभाघरांत भेटयतले. मुखेल सोयरे म्हूण आदले केंद्रीय मंत्री सुरेश प्रभू कार्यावळीक हाजीर आसतले.
चंद्रकांतबाब केणी हांच्या जयंती निमतान तांकां आदरान नमन.
– सखाराम शेणवी बोरकार.
9923306751
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
