भांगरभूंय | प्रतिनिधी
चेन्नय सुपरकिंग्सान इंडियन प्रिमियर लिगेचे (आयपीएल) प्ले ऑफांतली सुवात निश्चीत केली. गुजराता टायटन्सा उपरांत प्ले ऑफांत सुवात मेळोवपी चेन्नय सुपरकिंग्स दुसरो पंगड थारलो.
चेन्नय सुपरकिंग्सान दिल्ले 224 धांवड्यांचें आव्हान दिल्ली कॅपिटल्साक पेलपाक जमलें ना आनी ताका 77 धांवड्यांनी हार घेवची पडली. ताका 9 विकेटी वगडावन 146 धांवड्यो करप शक्य जाल्यो.
मुखेली डॅव्हिड वॉर्नरान परतून एकदा पंगडाक सांबाळपाचो यत्न केलो. फाटले मॅचींत बरी बॅटींग करपी पृथ्वी शॉ (5) दुसरेच ओव्हरींत बाद जालो. डॅव्हिड वॉर्नर आनी फिल सॉल्ट हांणी 22 धांवड्यांची भागिदारी करून दिल्ली कॅपिटल्साचो डाव सांबाळपाचो यत्न केलो. पूण, दीपक चहरान सॉल्ट (3) आनी रिली रोसू (0) हांकां सेगीत बॉलांचेर बाद केले. वॉर्नर एकलोच लडतालो. वॉर्नर आनी यश धूल (13) हांणी 49 धांवड्यांची भागिदारी करून कमबॅक करपाचो यत्न केलो. अक्षर पटेलूय (15) अपेशी थारलो. दीपक चहराचो तो तिसरो बळी थारलो.
अमन खान (7) बाद जाल्या उपरांत दिल्ली कॅपिटल्साची हार निश्चीत जाली. वॉर्नरान आपल्या पंगडाक जैत मेळोवन दिवपाचो यत्न केलो. पूण, ताका दुसरे वटेच्यान योग्य अशी साथ मेळूंक ना. वॉर्नरान 58 बॉलांनी सात चवके आनी पांच सक्यांचे मजतीन 86 धांवड्यो करून कॅच बाद जालो. मथिशा पथिराणाच्या बॉलाचेर ऋतुराज गायकवाडान जबरदस्त कॅच धरली. महिष थिक्षाणान 20वे ओव्हरींत सेगीत दोन विकेटी घेतल्यो आनी दिल्लीन 9 विकेटी वगडावन 146 धांवड्यां मेरेन मजल मारली.
ते पयलीं ऋतुराज आनी डॅव्हॉन हांणी पयले विकेटी खातीर 141 धांवड्यांची भागिदारी करून चेन्नय सुपरकिंग्साक बरी बुन्याद घालून दिली. ऋतुराजान 50 बॉलांनी तीन चवके आनी सात सक्यांचे मजतीन 79 धांवड्यो केल्यो. जाल्यार डॅव्हॉनान 52 बॉलांनी 87 धांवड्यो केल्यो. हातूंत 11 चवक्यांचो आनी तीन सक्यांचो आस्पाव आशिल्लो. ऋतुराज बाद जाल्या उपरांत डॅव्हॉनान शिवम दुबे (22) वांगडा मेळून 22 बॉलांनी 54 धांवड्यांची भागिदारी केली. रवींद्र जडेजा (नाबाद 20) आनी धोनी (5) हांणी अखेरचे ओव्हरींनी 22 धांवड्यो जोडून पंगडाक 3 बाद 223 मेरेन पावयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
