चेन्नय सुपरकिंग्साचें आकर्शक जैत

भांगरभूंय | प्रतिनिधी

चेन्नय सुपरकिंग्सान इंडिनय प्रिमियर लिगेचे (आयपीएल) प्ले ऑफांत सुवात मेळोवपाचे वटेन मोठी उडी घेतली. दिल्ली कॅपिटल्साक 27 धांवड्यांनी हारोवन गुणतकट्यांतली 15 गुणां सयत दुसरी सुवात घट केली. दुसरे वटेन मात दिल्ली कॅपिटल्साचें प्ले ऑफांतलें आव्हान लागीं लागीं सोंपिल्ल्यांत जमां जालां.

चेन्नय सुपरकिंग्सान दिल्ले 168 धांवड्यांचे मोखीचो फाटलाव करपी दिल्ली कॅपिटल्साक 8 विकेटी वगडावन 140 धांवड्यो करप शक्य जाल्यो.

इम्पॅक्ट प्लेयर मथिषा पथिराणान डॅथ ओव्हरींनी दोन म्हत्वाच्यो विकेटी घेवन मॅच घुंवडायली. दीपक चहरान सुरवातीकूच दोन धपके दिल्ले. दिल्ली कॅपिटल्साक प्ले ऑफाचे सर्तींत रावपाक उरिल्ल्यो तिनूय मॅची जिखच्यो पडटल्यो. हाचे खेरीत हेर पंगडांच्या प्रदर्शनाचेर लेगीत निंबून रावचें पडटलें.

दिल्लीची सुरवात बरी जाली ना. दुसऱ्या बॉलाचेर दीपक चहरान मुखेली डॅव्हिड वॉर्नराक (0) कॅच बाद केलो. फिल सॉल्ट (17) हांणी बरी बॅटींग केली. पूण, तिसरे ओव्हरींत चहलान ताका लेगीत तंबूंत धाडलो.

मनीष पांडे इम्पॅक्ट प्लेयर म्हणून मैदानांत देंवलो. पूण, ताचे चुकीच्या कॉलाचेर मिचेल मार्श धांवबाद जालो. दिल्ली कॅपिटल्साक 25 धांवांत तिसरो धपको बसलो आनी पावर प्लेंत तांकां 48 धांवड्यो करपाक जमल्यो. पांडे आनी रिली रोसोवू हांणी बरी खेळी करून दिल्लीचो डाव सांबाळ्ळो आनी 51 बॉलांनी अर्द शेंकड्याची भागिदारी केली.

स्पिन बॉलरांक खेळपट्टीचेर धोनी इम्पॅक्ट प्लेयर म्हणून स्पिनर मिचेल सॅंटनराक हाडटलो अशें दिशिल्लें. पूण, मथिषा पथिराणाक हाडलो आनी ताणें पयलेच ओव्हरींत आपल्या मुखेल्याचो निर्णय योग्य थारायलो. 27 धांवड्यांची खेळी करून रोसोवू वांगडा 59 धांवड्यांची भागिदारी करपी पांडेक एलबीडब्ल्यू बाद केलो.

दिल्लीक 36 बॉलांनी 80 धांवड्यांची गरज आशिल्ली. आनी रवींद्र जडेजान दिल्लीचो सेट बॅट्समन रोसोवूक (35) बाद केलो. अक्षर पटेलान लेगीत खर प्रतिकार केलो. पूण धांवड्यो आनी बॉल हांचे मदीं वाडिल्लें अंतर उणें करपाच्या यत्नांत तो 21 धांवड्यो करून बाद जालो. हांगाच दिल्लीच्या हातांतल्यान मॅच गेली.

12 बॉलांनी 48 धांवड्यो करपाची गरज आशिल्ली. ललित यादवान 20वे ओव्हरींत सेगीत तीन चवके मारून 12 धांवड्यांचेर बाद जालो. अखेरेक दिल्लीक 8 विकेटी वगडावन 140 धांवड्यो करप शक्य जाल्यो.