भांगरभूंय | प्रतिनिधी
इंडियन प्रिमीयर लिगेच्या प्ले ऑफाक आयच्यान सुरवात जाता. चेन्नय सुपरकिंग्स आनी गुजरात टायटन्स ह्या पंगडां मदीं आयज क्वॉलिफायर एक मॅच जातली.
गुजरात टायटन्स सध्याचो वस्ताद आसा जाल्यार चेन्नय सुपरकिंग्सान चार खेपे वस्तादपण जोडलां. ताका लागून ह्या पंगडां मदीं उमळशीक वाडोवपी मॅच जावपाची शक्यताय आसा.
आयज जिखपी पंगड थेट फायनलींत सुवात मेळयतलो. जाल्यार हारपी पंगड क्वॉलिफायर दोनांत अॅलिमिनेटर जिखपी पंगडा आड खेळटलो. दोनूय पंगडां मदीं आतां मेरेन तीन खेपे एकामेका आड खेळ्ळ्यात.हातूंत गुजरातान चेन्नय आड आपलो शेक दवरला. ताका लागून आयचे मॅचींत गुजराताचो शेक दिसून येवपाक शकता. पूण, चेन्नय आपल्या घरच्या मैदानाचेर खेळटा ताका लागून मॅचींत कितेंय घडपाक शकता.
चेन्नय सुपरकिंग्स प्ले ऑफांत 11 हंगामांनी 24 मॅची खेळ्ळा. तातूंतल्यो 15 मॅची जिखल्यात जाल्यार णव मॅचींनी हार घेतल्या. प्ले ऑफांत ताची जिखपाची टक्केवारी 62.5% इतली आसा. 2009 आनी 2014 ह्या हंगामांनी बरें प्रदर्शन करून लेगीत पंगडाक फायनलींत सुवात मेळोवपाक जमूंक ना. 2008, 2012, 2013, 2015 आनी 2019त ताका उप वस्तादपणाचेर समाधान मानचें पडलां, जाल्यार 2010, 2011, 2018 आनी 2021त ताणें वस्तादपण जोडलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
