भांगरभूंय | प्रतिनिधी
येजमान चेन्नयीयन एफसीक इंडियन सुपर लिगेंत (आयएसएल) घरच्या मैदानांत खेळटना 1-1 अशा बरोबरीचेर समाधान मानचें पडलें. केरळा ब्लास्टर्सान 23व्या मिनटाक गोल करून आघाडी घेतिल्ली. पूण, दुसऱ्या अर्दांत येजमान पंगडान बरोबरीचो गोल केलो. ते उपरांत सातत्यान यत्न करून लेगीत दोनूय पंगडांक गोल करपाक जमलो ना.
सहल अब्दुल समदान केरळा ब्लास्टर्सा वतीन जाल्यार व्हिन्सी बरेट्टोन चेन्नयीयन एफसी वतीन गोल केलो. फाटल्या सेगीत पांच मॅचींनी जैत जोडपी केरळा ब्लास्टर्साक काल बरोबरीचेर समाधान मानचें पडलें.
दुसरे वटेन चेन्नयीयन एफसी अंदूंच्या हंगामांत वट्ट पांच मॅची घरच्या मैदानाचेर खेळ्ळा. पूण, ताका फकत एकूच जैत जोडप शक्य जालां.
12व्या मिनटाक व्हिन्सी बार्रेटोन बॉल गोलपोस्टाच्या सामको लागीं घेवन पाविल्लो. एक कीक चेन्नयीयनाक आघाडी मेळोवन दिवपाक शकताली. पूण, बार्रेटो स यार्डा वयल्यान गोल करपाक चुकलो. ताच्या पांयाक बॉलूच लागलो ना. 21व्या मिनटाक लुनान 40 मिटरा वयल्यान परत एकदा ऑन टार्गेट यत्न केलो. पूण, गोलकीपरान हवेंत उडी मारून तो आडायलो.
केरळा ब्लास्टर्साक 23व्या मिनटाक येस आयलें. इव्हान कलियुझनीच्या पासाचेर सहल अब्दुल समदान फिशालकायेन गोल केलो. बॉल आडावपा खातीर मुखार आयिल्लो गोलकीपर मजुमदाराक चकयत हो गोल केलो.
26व्या मिनटाक केरळा ब्लास्टर्साक आघाडी वाडोवपाची संद आशिल्ली. दिमित्रओस डिएमांटाकोसाक समदाक योग्य पास दिवपाक जमलो ना.
पयल्या अर्दांत चेन्नयीयन एफसीन गोल करपाच्यो कांय सोंप्यो संदी वगडायल्यो.
पयल्या अर्दांत वगडायिल्ल्यो संदीची भरपाय व्हिन्सी बार्रेटोन दुसऱ्या अर्दांत भरून काडली. ताणें 48व्या मिनटाक गोल करून चेन्नयीयन एफसीक 1-1 अशी बरोबरी सादून दिली.
चेन्नयीयन एफसी घरच्या मैदानाचेर खेळटना केरळा ब्लास्टर्सा आड एकूय हार घेवंक ना. ही परंपरा कालचे मॅचींतूय कायम राखली.
चेन्नयीयन एफसीन दुसऱ्या अर्दांत आक्रमक खेळ केलो. 60व्या मिनटाक पिटर स्लिस्कोव्हिचान चेन्नयीयन वतीन दुसरो गोल करपाचो यत्न केलो. पूण, रॅफ्रीन ऑफ सायडाचो फ्लॅग दाखयलो.
चेन्नयीयन एफसीच्या खेळगड्यांनी दुसऱ्या अर्दांत आत्मविस्वासान खेळ केलो आनी ताका लागून ब्लास्टर्स बॅकफुटाचेर गेल्ल्याचो दिसलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
