भांगरभूंय | प्रतिनिधी
इंडियन प्रीमियर लीग अर्थांत आयपीएलाच्या सोळाव्या हंगामाची हालींच सांगता जाली. सोमारा जाल्ल्या आंगार रोमांच हाडपी मॅचींत महेंद्रसिंह धोनीच्या चेन्नय सुपरकिंग्स पंगडान हार्दिक पांड्याच्या गुजरात टायटनाक निमाण्या बाॅलार हार घाली आनी पांचवे खेपे आयपीएल ट्रॉफीचेर नांव कोरांतलें. निमणे मॅचींत पाविल्ले दोनूय पंगड हे ‘एक से बढकर एक’ आशिल्ले, कारण दोगांयनीय सांखळी मॅचींत बरी कामगिरी करून पॉयंट टेबलाचेर पयलें आनी दुसरें स्थान मेळयिल्लें. ताका लागून फायनल सामकी रंगतदार म्हणटात तशी जातली, हातूंत कोणाक दुबाव नासलो. खरें म्हणल्यार ही मँच आयतारा जावपाची, मात पावसाक लागून ती सोमारा खेळयली.
पयलीं बॅटिंग करतना गुजरातान अपेक्षे प्रमाण बरी बॅटिंग करून दोनशेचो आंकडो हुपलो. तांच्या शुभमन गिल, साई सुदर्शन, कॅप्टन हार्दिक पांड्या हांणी बरी बॅटिंग करून पंगडाच्यो धांवड्यो 214 चेर व्हेल्यो. 215 धांवड्याचें लक्ष्य घेवन मैदानांत देंविल्ल्या चेन्नय पंगडा खातीर हें व्हडलें आव्हान आशिल्लें. कारण पंगडांत जडेजा सोडल्यार कोणूच व्हडलो सुपरस्टार नाशिल्लो, तशेंच आंतरराष्ट्रीय मळाचेर नांव निर्माण केल्लो बॅट्समन नाशिल्लो. तांचे कडेन आशिल्लो फक्त धोनी. हय तोच धोनी, जाणें आपल्या खेळगड्यां मदीं आत्मविश्वास निर्माण केलो आनी तांणीय धोनीन तांचेर दवरिल्लो विस्वास सार्थ थारायलो.
ओपनर ऋतुराज गायकवाड आनी व्डेन कॉन्व्हे हांणी पेजाद खेळ केलो. उरिल्ल्या खेळगड्यांनीय आपली जबाबदारी सांबाळून खेळ केलो. निमण्या दोन बाॅलांचेर 10 धांवड्यो जाय आशिल्ल्यो. जडेजान मोहीत शर्माक सको मारलो. उपरांत निमण्या बाॅलाचेर चौको मारून ताणें चेन्नय किंग्साक जैतिवंत केलें. सगल्याच खेळगड्यांक खोस मनोवपाची संद मेळोवन दिली. ह्या जैतान चेन्नयान पांचवे खेपे आयपीएल ट्रॉफी जिखून मुंबयची बरोबरी केली. ह्या पंगडाच्या खेळगड्यांक जितलें श्रेय वता तितलें, खरें म्हणल्यार चड श्रेय धोनीक वता. कारण ह्या जैता फाटलो खरो सुत्रधार कोण आसा जाल्यार तो धोनी. ह्या आयपीएलांत ताणें परतून एक फावट आपणाक संवसारांतलो सगळ्यांत बरो कर्णधार कित्याक म्हणटात, तें दाखयलें.
खरें म्हणल्यार ह्या काळांतल्या चेन्नई पंगडांत ‘दादा’ म्हणपा सारको खेळगडो नाशिल्लो. धोनी आंतरराष्ट्रीय क्रिकेटांतल्यान निवृत्त जाल्लो. जडेजा सोडल्यार पंगडांत आंतरराष्ट्रीय खेळगडो नाशिल्लो. आंतरराष्ट्रीय कारकिर्द सोंपूंक पाविल्ल्या आनी नव्या खेळगड्याचो हो पंगड आशिल्लो, पूण परिसाच्या स्पर्शान लोखणाचें भांगर जाता, अशें म्हणटात, तशेंच रुपांतर ह्या खेळगड्यां मदीं जालें. धोनीच ह्या पंगडाचो परिस आशिल्लो. धोनीन पंगडांतल्या दरेका खेळगड्याक आपले जापसालदारकेची जाणविकाय करून तांकां अपेक्षा केल्ले प्रमाण कामगिरी करपाक लायली.
ऋतुराज गायकवाड आनी कॉनवे हे दोगूय नवे. शिवम दुबेय नवो खेळगडो. ह्या खेळगड्यांक अजून आंतरराष्ट्रीय क्रिकेटचो अणभव ना आनी अजिंक्य रहाणेची टी-20 कारकिर्द सोंपिल्ल्यांतूच जमा आशिल्ली. ताका पावणेंत कोणेंच विकत घेवंक नासलो. रायडूय निमाणी आयपीएल खेळटालो जाल्यार बाॅलरां मदीं तुषार देशपांडे, पथरीणा, तक्षीणा हांचें नांव पसून कोणाक खबर नासलें. पूण, हे खेळगडे धोनीच्या पंगडांत आयले आनी ताणें ह्या खेळगड्यांचो दर्जो पळोवन तांचे कडल्यान अपेक्षीत कामगिरी करून घेतली. आपल्या पंगडाक जैत मेळोवन दिलें. धोनीच्या स्पर्शाक लागून हे खेळगडे भांगराचे जाले आनी हो पंगड जिखलो. धोनीन परत एक फावट चेन्नय हो ‘सुपर किंग’ हें सिद्ध केलें. जैतिवंत चेन्नय पंगडाक परबीं!
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
