चेन्नयचो हारीचो क्रम चालूच

भांगरभूंय | प्रतिनिधी

लोकेश राहुलान 51 बॉलांनी काडिल्ल्या 77 धांवड्यां नेटार डबर हेडराचे पयले मॅचींत दिल्ली कॅपिटल्सान येजमान चेन्नय सुपरकिंग्साक 25 धांवड्यांनी हारयलो. दिल्ली कॅपिटल्सान चेपॉक मैदानाचेर 2010 उपरांत पयले खेपे चेन्नय पंगडाक हारयलो.

दिल्ली कॅपिटल्सान निर्धारीत 20 ओव्हरींनी 6 विकेटी व्हगडावन 183 धांवड्यो केल्यो आनी उपरांत चेन्नयचो डाव 5 बाद 158 धांवड्यांचेर आडायलो. चेन्नय सुपरकिंग्स सध्या फॉर्मांत ना. फाटल्या चारांतली सेगीत तिसरी मॅच ताणें व्हगडायली. दुसरे दिल्ली कॅपिटल्सान सेगीत तिसरें जैत जोडलें.

टॉस जिखना फुडें अक्षर पटेलान पयलीं बॅटींग करपाचो निर्णय घेतलो. फ्रेझर मक्गर्क शुन्याचेर बाद जालो खरो पूण, फाफ ड्युप्लेसिसाचे गैरहाजेरेंत डावाची सुरवात करपाक आयिल्ल्या राहुलान बिंदास बॅटींग केली. सुरवातीक ताणें अॅंकराची भुमिका वठयली. जाल्यार दुसरे वटेच्यान अभिषेक पोरेलान 20 बॉलांनी 33 आनी अक्षर पटेलान 14 बॉलांनी 21 धांवड्यांची खेळी करून दिल्लीची रन रेट मुखार दवरली. दोगूय बाद जाल्या उपरांत राहुलान सगलीं सुत्रां आपल्या हातांत घेतलीं आनी 33 बॉलांनी अर्द शेंकडो पुर्ण केलो. ताणें नूर अहमदाची बॉलींग फोडून काडली. ताका लागून नूर अहमदाक आपलो कोटा लेगीत पुर्ण करपाक जमलो ना.

डॅथ ओव्हरींनी मतीशा पथिरानाक उत्कृश्ट बॉलींग केली. ताणें आपल्या निमाण्या दोन ओव्हरींनी एकूय चवको दिलो ना. ताका लागून एका वेळार दिल्ली सहज 200चो आंकडो सहज हुपतलो अशें दिशिल्लें. पूण, ताका 183चेर समाधान मानचें पडलें.

184 धांवड्यांचो फाटलाव करपी चेन्नय सुपरकिंग्साची सुरवात बरी जाली ना. ताणें दुसरेच ओव्हरींत रचिन रविंद्राची विकेट व्हगडायली. मुखेली ऋतुराज गायकवाडाक मिचेल स्टार्कान रोखडोच बाद करून चेन्नयची सुरवात इबाडून उडयली. कांय वेळा उपरांत जबरदस्त बॉलींग करपी विप्रज निगमान डॅव्होन कॉन्वे आनी इम्पॅक्ट सब खेळगडो शिवम दुबे हांकां बाद करून चेन्नय सुपरकिंग्साक मॅचींत येवपाची सगलीं दारां बंद करून उडयली.

दुसरे वटेन आशिल्ल्या विजय शंकरान नाबाद अर्द शेंकडो नोंदयलो. पूण, ताच्या बॅटांतल्यान 80 टक्के शॉर्ट चुकले. तशेंच ताच्यो दोन कॅची सुटल्यो आनी एकदा एलबीडब्ल्यू बाद जावपा पसून वाटावलो. शंकरान 54 बॉलांनी 69 धांवड्यो केल्यो. महेंद्रसिंग धोनी अखेर मेरेन मॅच व्हरपाचो यत्न केलो खरो. पूण, ताणें 26 बॉलांनी फकत 30 धांवड्यो केल्यो. हातूंत फकत एक चवको आनी एक सको आशिल्लो. अशे तरेन चेन्नयक 20 ओव्हरींनी 5 विकेटी व्हगडावन 158 धांवड्यो करप शक्य जाल्यो.