भांगरभूंय | प्रतिनिधी
चेन्नय, खबरां संस्था: भारतीय हवाई दळाच्या ९२ व्या वर्धापन दिसा निमातन चेन्नयक एका एअर शोचें आयोजन केल्लें. मात ह्या शो मजगतीं डिहायड्रेशनाक लागून पांच जाणांक मरण आयिल्ल्याची घडणूक घडल्या. तशेंच वट्ट २३० जाणांक हॉस्पिटलांत दाखल केल्यात. हे घडणुकेंत श्रीनिवासन (४८,रा.पेरुंगलाथूर), कार्तिकेयन (३४) तिरुवोट्टीयुर आनी जॉन (५६) रा.कोरुकुपेट अशी मरण आयिल्ल्या तिगांचीं नांवां जावन आसात.
अधिकार्यांचे म्हायती प्रमाण, भारतीय हवाई दळाच्या ह्या एअर शोचो लिम्का बुक ऑफ वर्ल्ड रेकॉर्डांत आस्पाव करतले. हो शो पळोवपाक हांगा सुमार १६ लाख लोकांची गर्दी जमिल्ली. हो शो सकाळीं ११ वरांचेर सुरू जाल्लो. उपरांत दोन वरां हो शो सुरु आशिल्लो. मात ही कार्यावळ पळोवपाक सकाळच्या ८ वरां सावनूच लोक चेन्नईच्या मरीना दर्या वेळेर जमिल्ले.
ह्या वेळार इतल्या लोकांचें नियोजन योग्य तरेन जावंक ना आनी लाखांनी लोक हे गर्देंत आडकले. शारांतल्या विंगड विंगड वाठारांनी गर्देक लागून लाखांनी लोक आडकून पडिल्ले. इतले व्हड संख्येन लोक एकठांय आयिल्ल्यान आनी लोकांक उदक मेळूंक नाशिल्ल्यान त्रास जावपाक लागले. कांय जाणांची भलायकी इबाडली. गर्देक लागून थंय आशिल्ल्या उदक विके्रत्यांक थंयच्यान काडिल्ले.
मजगतीं, ही कार्यावळ सोंपले उपरांत लाखांनी नागरीक वांगडाच भायर आयिल्ल्यान ही घडणूक घडिल्ल्याचें समजता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
