भांगरभूंय | प्रतिनिधी
पंजाब किंग्सान काल जाल्ले इंडीयन प्रिमीयर लिगेचे (आयपीएल) 49वे मॅचींत येजमान चेन्नय सुपरकिंग्साक 7 विकेटींनी हारयलो. चेन्नयक ताच्याच घरच्या मैदानाचेर हारोवपी पंजाब किंग्स अंदूंच्या हंगामांतलो दुसरो पंगड थारलो. पंजाबान चवथें जैत जोडून प्ले ऑफांतली आपली आस्त कायम राखली. चेन्नय 10 गुणां सयत चवथे सुवातेर आसा.
चेन्नयन दिल्ली 163 धांवड्यांची मोख पंजाबान 17.5 ओव्हरींनी 3 विकेटी व्हगडावन मेळयली. पंजाबा वतीन जॉनी बॅयरस्टोन 46, रिले रोसौवान 43 धांवड्यांचें योगदान दिलें.
ते पयलीं पंजाब किंग्साच्या बॉलरांनी बेसबरी बॉलींग करून चेन्नय सुपरकिंग्साच्या बॅट्समनांचेर अंकूश दवरलो. संवसारीक टी-20 सर्ती खातीर निवड जाल्ले रवींद्र जडेजा आनी शिवम दुबे हे खेळगडे अपेशी थारले. स्पिनरांनी पंजाब किंग्साक मॅचीचेर पकड मेळोवन दिली. पूण, चेन्नय सुपरकिंग्साचो मुखेली ऋतुराज गायकवाडान एक बाजू सांबाळून धरली. ताणें अर्द शेंकड्याची खेळी करून अंदूंच्या हंगामांतली ऑरेंज कॅप आपल्या नांवार केली. ताणें कोहलीक फाटीं घालो.
मजगतीं, पंजाब किंग्सान टॉस जिखून चेन्नय सुपरकिंग्साक पयलीं बॅटींग करपाचें आमंत्रण दिलें. तुषार देशपांडे आनी मथिशा पथिराणा हांचे सुवातेर शार्दुल ठाकूर आनी रिचर्ड ग्लिसन हांकां निमाण्या इकरांत सुवात दिली. कगिसो रबाडा आनी सॅम कुरन हाणें जबरदस्त बॉलींग घालून चेन्नयच्या ओपनरांक बांदून दवरले. पूण, ऋतुराज आनी अजिंक्य रहाणे हाणें अर्शदीप सिंगाचे बॉलिंगेचेर व्हड शॉर्ट खेळपाचें थारायलें. अर्शदीपाचे पयले ओव्हरींत 10 धांवड्यो आयल्यो. ताका लागून मुखेली कुरनान ताका विसव दिलो. पूण, पांचवे ओव्हरींत परतून अर्शदीपाची बॉलींग फोडून काडली. हे ओव्हरींत 15 धांवड्यो दिल्यो. पावर प्लेचे निमाणे ओव्हरींत अजिंक्यान आत्मविस्वासान बॅटींग करून 19 धांवड्यो केल्यो. चेन्नय सुपरकिंग्सान पावर प्लेंत 55 धांवड्यो केल्यो. पूण, पंजाबान स्पिनरांक हाडले तांणी उण्यो धांवड्यो दिल्ल्यान अजिंक्याचेर चेपण आयलें. तो 24 बॉलांनी 29 धांवड्यो करून हरप्रीत ब्रारचे बॉलिंगेचेर कॅच बाद जालो आनी चेन्नयक 64 धांवड्यांचेर पयलो धपको बसलो.
शिवम दुबेक बॅटिंगेक वयले सुवातेर धाडलो. पूण, हरप्रीतान ताका शुन्याचेर एलबीडब्ल्यू बाद करून चेन्नयक व्हड धपको दिलो. राहुल चहरान 10वे ओव्हरींत रवींद्र जडेजाक (2) एलबीडब्ल्यू बाद करून चेन्नयची अवस्था बिकट केली. स्पिनरांक तोंड दिवप चेन्नयच्या बॅट्समनांक कठीण जातालें आनी ताका लागून पंजाबाचो आत्मविस्वास वाडिल्लो दिसलो. हरप्रीत ब्रारान चार ओव्हरींनी 17 धांवड्यो दिवन 2 विकेटी घेतल्यो. 57 बॉलां उपरांत चेन्नयचो पयलो चवको आयलो.
इम्पॅक्ट खेळगडो समीर रिझवी 21 धांवड्यांचेर कॅच बाद जालो. ऋतुराजान 44 बॉलांनी अर्द शेंकडो पुर्ण केलो आनी ऑरेंज कॅपाचे रेसींत ताणें विराट कोहलीक फाटीं घालो. मोईन अलीन कांय आकर्शक शॉर्ट मारून चेन्नयच्या धांवड्यांची गती वाडयली. ऋतुराजान आनीक एक विक्रम आपल्या नांवार केलो. चेपॉक मैदानाचेर एका हंगामांत सगल्यां चड 396 धांवड्यो करपी पयलो बॅट्समन थारलो.
डेव्हॉन कॉन्वेन 2023त 390 धांवड्यो केल्ल्यो. ऋतुराज 48 बॉलांनी 5 चवके आनी दोन सके मारून 62 धांवड्यांचेर अर्शदीपाच्या बॉलाचेर बोल्ड जालो. 19वे ओव्हरींत राहुल चहरान मोईन अलीक (15) बोल्ड केलो. ते ओव्हरींत फकत तीन धांवड्यो आयल्यो. चहरान 16 धांवड्यो दिवन 2 विकेटी घेतल्यो. अर्शदीपान घाल्ले 20वे ओव्हरींत धोनीन 13 धांवड्यो करून चेन्नयक 6 बाद 162 मेरेन पावयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
