भांगरभूंय | प्रतिनिधी
कोणेय पयशे मागल्यार रोखडेच उश्णे दिवपी गोंयकार आसात. फक्त विस्वास दवरून केल्लो हो वेव्हार.
अामचें गोंयकार तशे ओर्राद, पयशे मोडपाक बी आयकनात. कुंड्यार शिजता, तांची खबर सोडात, पूण पादिसेर पसून काॅलर उडयत झेत मारतात. ह्याच गोंयांत चेक बावन्स जावपाचीं प्रकरणां वाडल्यांत. सरकारी आंकडेवारी प्रमाण, 2021 ते 2025 ह्या काळांत चेक बावन्स जावपाच्यो 20 हजार 543 केशी नोंद जाल्यात. म्हणल्यार दिसाक सरासरी इकरा जाल्यो. उत्तर गोंयांत 14 हजार 580, तर दक्षीणेंत 5963 केशी. मडगांव, दिवचल, फोंडें, वाळपय न्यायालयांत चड केशी आसात. कांय जाणांच्या नांवान वाॅरंट काडल्यात, तर थोड्या दुबावितांक तंत्रज्ञानाचो वापर करून सोदपाचें काम चालू आसा, अशें सरकारान स्पश्ट केलां. आतां ह्या प्रकरणांनी कितले गोंयकार आसात आनी कितले भायले ताचो आंकडोय जाहीर जावंक जाय.
प्रामाणीक वेव्हार हेंच वेपाराचें खरें भांडवल. वेव्हारांत विस्वास हेंच खरें चलनाचें मोल. तें तुटलें काय चेकूच न्हय, तर नातेसंबंदूय बावन्स जातात, हें कोणेंच विसरूंक फावना. पयशे नासतना मुद्दाम चेक दिवप हो कायद्याचोच न्हय, तर विस्वासाचोय अपमान थारता. मात हें सगलें खबर आसूनय बरेच जाण फट पत्तो, चेक दितात आनी तोंड लिपयत भोंवतात. थोडे गांवूच सोडून वतात. खास करून व्हडल्या वेव्हारांत चेकान दिवप- घेवप जाता. चेका प्रमाण उश्णे पयसे व्हरपीय अशेच वागतात. चेक बावन्स जावपाचे प्रकार खास करून रीण काडिल्ल्या व्यक्तींचे बाबतीत जातात. कांय नकळटांय जातात, पूण थोडे मुद्दाम करतात.
चेक बावन्स जातकच 30 दिसां भितर संबंदीत मनशाक कायदेशीर नोटीस धाडपाक जाय. उपरांत 15 दिसांनी पयशे दिवंक नात, जाल्यार गुन्यांव दाखल करूं येता. तो सिद्ध जाल्यार दोन वर्सां मेरेन बंदखण वा दुपेट रक्कम भरची पडूं येता. चेक बावन्स जावपाचे प्रकार गोंयांतूच न्हय, तर पुराय देशांत व्हड प्रमाणांत जातात. खात्यांत पयशे नासतनाय थोडे चेक दितात. हें चेक बावन्स जावपाचें सगल्यांत व्हडलें कारण.
वेपारांत उधारेचेर वेव्हार करप्यांच्या हातांत पयशे उरनात. वेवसायांत लुकसाण जाता. अचकीत व्हडलें अर्थीक संकश्ट येता. दुयेंस जाता. कांय लोक पोको नेट दाखोवंक वा दुसरो मोडटा म्हूण आपूणय पयशे मोडटात. ते खातीर रीण काडटात. उत्पन्ना परस म्हारगी जिणेशैली दवरतात. मागीर रिणार रीण काडप आनी त्रासांत पडप. ऐपती परस व्हडलो हात घाल्ल्यान बरेच वेपारी, उद्देजक बुडल्यात. जाणूनबुजून फटवणूक करपीय आसतात. ते पयशे नासतना चेक दितात. हो अर्थीक गुन्यांव. चुकीची सय, नांव, तारीख चुकीची, खातें बंद आसल्यार चेक बावन्स जाता. ह्या वेळार चेक घेवपी समंजस आसल्यार सुटलो, नाजाल्यार आडकलो. रीण काडून पयशे भरप ना, होय गुन्यांव. रीण काडटना तें फारीक करपाक जातलें वो ना, आपले चेक बावन्स जातले काय ना, हें पयलींच पळोवंक जाय. पयशांचे बाबतींत केल्लें अनुकरण संबंदीत मनशाक त्रासांत
उडोवंक शकता.
कोणेय पयशे मागल्यार रोखडेच उश्णे दिवपी गोंयकार आसात. फक्त विस्वास दवरून केल्लो हो वेव्हार.आमच्या देशांत चेक बावन्स जावपाचीं 40 लाखां वयर प्रकरणा न्यायालयांत आडकून उरल्यांत. दिल्ली जिल्हो न्यायालयांत साडे स लाख चेक बावन्स प्रकरणां आसात. मुंबयंत 1 लाख 17 हजारांच्या आसपास. गोंयांत बांदकाम, रियल इस्टेट प्रकरणांनी चेक बावन्स जावपाचे प्रकार वाडल्यात. चेक दिवप्याक जायते फावटी बँकेच्या नेमांची म्हायती नासता. डिजिटल वेव्हार वाडोवप हो एक उपाय. चेका बदला डिमांड ड्राफ्ट, बँक ट्रान्सफर वाडपाक जाय. दरेकल्याक अर्थीक शिस्त लागतली, तेन्नाच चेक बावन्स जावपाचे बंद जातले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
