भांगरभूंय | प्रतिनिधी
पणजी: बायलांच्या भलायकेची फुकट चांचणी करपी चेक्ड बाय दोतोर मोहिमे खाला 8 दिसांत 16,560 बायलांची चांचणी जाल्या. भलायकी खात्या कडल्यान ही म्हायती मेळ्ळी.
संवसारीक बायलां दिसाच्या म्हुर्तार मुख्यमंत्री डॉ. प्रमोद सावंत हांणी हे येवजणेची घोशणा केल्ली. 40 वर्सां वेल्या बायलांचो कांक्र, हायपरटेंशन हो सयत हेर दुयेंसां खातीर फुकट चांचणी करपी येवजण सुरू जाल्या. भलायकी केंद्रां, जिल्हो हॉस्पिटलां तशेंच गोंय वैजकी म्हाविद्यालय हॉस्पिटलांत फुकट चांचणेची वेवस्था आसा. दरेका म्हालांतल्या एका खासगी हॉस्पिटलांत लेगीत सवलतीच्या दरांत चांचणीची सोय उपलब्ध करपाचे सुतोवाच मुख्यमंत्री डॉ. प्रमोद सावंत हांणी केल्लें.
चेक्ड बाय दोतोर मोहिमेक बायलां कडल्यान व्हड प्रमाणांत प्रतिसाद मेळटा. आतां मेरेन 16,560 बायलांनी फुकट चांचणी केल्या. हाचे पैकीं 16 मार्चाक 2280 बायलांची चांचणी जाली. हायपरटेंशना खातीर 11,758, गोडेंमुता खातीर 10,443, थानाच्या कांक्रा खातीर 5,484, तोंडाच्या कांक्रा खातीर 6,341 जाणांची चांचणी जाल्या. ते भायर आयुश हॉस्पिटलांत 5,019 बायलांची तपासणी जाल्या. हिमोग्लोबीना खातीर 6,459, अॅनिमिया खातीर 1217 जाणांचेर उपचार जाले. ते भायर 6383 बायलांचे भलायके खातीर समुपदेशन जालें. 1041 बायलांक कॅल्शीयमाच्यो जाल्यार 1188 बायलांक आयर्नाच्यो गुळयो दिल्यो. 894 बायलांक सॅनीटरी नॅपकीन दिलें.
चेक्ड बाय दोतोर मोहिमे खाला फुकट चांचण्यो जावपा सयत भलायके विशीं समुपदेशन तशेंच दुयेंतीचेर उपचार लेगीत जातात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
