भांगरभूंय | प्रतिनिधी
पणजी : गोंय सरकारान सुरू केल्ले ‘चेक्ड बाय दोतोर’ हे मोहिमेक गोंयभरांतल्यान बरो प्रतिसाद मेळ्ळो. ह्या उपक्रमा खाला 8 ते 31 मार्च ह्या काळांत 37 हजार 295 बायलांची तपासणी केली. हातूंत बायलांची 11 विवीध तरांच्या दुयेंसां खातीर तपासणी केली. जाल्यार कांय बायलांक वखदां, लस दिली. गोंय सरकारान संवसारीक बायलां दिसाच्या निमतान 8 मार्चाक ही मोहीम सुरू केल्ली. हातूंत 40 वर्सां वयल्या बायलांची फुकट भलायकी तपासणी केली.
मेळिल्ले म्हायती प्रमाण, मोहिमेंत उच्च रक्तदाबा खातीर 27,023 बायलांची तपासणी केली. गोडेंमुता खातीर 23,036, स्तनांच्या कॅन्सरा खातीर 11,347, तोंडांच्या कॅन्सरा खातीर 12,793, निमिया खातीर 12,563 जाल्यार युरीन इन्फेक्शना खातीर 5,943 बायलांची तपासणी केली. तशेंच 379 बायालंक टीडी लस जाल्यार 120 बायलां एचपीव्ही लस दिली. 2,409 बायलांक आनी रक्तांतलें लोह वाडोवपा खातीर गुळयो दिल्यो. जाल्यार 2,494 बायालंक कॅल्शियम गुळयो दिल्यो.
मोहिमे वेळार 1,396 बायलांक सॅनिटरी पॅड दिलें. 6,129 बायलांक कुटुंब नियोजना खातीर सल्लो दिलो. 3,110 गुरवार बायलां आनी 569 बाळटेरा उपरांतच्या बायलांची तपासणी केली. 9,663 बायलांनी आयुष ओपीडी सेवांचो लाव घेतलो. 1,091 बायलांची पीएपी खातीर तपासणी केली. जाल्यार 13,240 बायलांक वेगवेगळ्या विशयांचेर सल्लो दिलो. मोहिमे वेळार जिल्हो हॉस्पिटल, मुळावें आनी समाजीक भलायकी केंद्र आनी जीएमसी ह्या दोनूय सुवातांनी मोफत तपासणी केली.
मोहिमेंत कांय खाजगी हॉस्पिटलांचोय आस्पाव करून घेतिल्लो. ह्या हॉस्पिटलांत सवलतीच्या दरांत तपासण्यो केल्यो. हे खातीर दरेका म्हालांतल्या एका खाजगी हॉस्पिटलाची निवड केल्ली. हे मोहिमे खाला खाजगी हॉस्पिटलांत सामक्या उण्या दरांत ह्यो तपासण्यो केल्यो. बायलां आपले भलायके कडेन आडनदर करतात. तांणी वेळार तपासणी करून फुडारांत जावपी दुयेंसां टाळचे खातीर मोहीम सुरू केल्ली.
2,142 बायलां ऍनिमीक
वयल्या काळांत राज्यांतल्या 2,142 बायलांक ऍनिमिया आशिल्ल्याचें समजलें. 1,245 बायलांचें सँपल टीबीच्या अत्याधुनीक चांचणी खातीर धाडलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
