भांगरभूंय | प्रतिनिधी
कुजिरा आंदोलना वेळार आम आदमी पक्षाची मागणी
पणजीः सरकारी नोकरेचे हांयस दाखोवन पयशे घेवन फटोवपी कथीत नोकरी भानगडीची न्यायालयीन चवकशी करची. तशेंच जे लोक कागाळ करतात आनी जांकां अटक जाल्या तांचेर चेंपण हाडिनासतना प्रकरणाची खोलायेन चवकशी करची, अशी मागणी आम आदमी पक्षान केली. मंत्र्यांनी हे विशीं कागाळ करपी आनी जांकां अटक जाल्या तांकां धमकावपाचे यत्न चालू केल्यात, असो आरोप पक्षान केलो.
नोकरी भानगडीचेर आम आदमी पक्षाच्या तरणाट्या विभागान कुजिरा शिक्षणीक संकुलांत आगळें वेगळें आंदोलन घडोवन हाडलें. ह्या आंदोलना विशीं म्हायती दितना आपाचे निमंत्रक वाल्मिकी नायक हांणी सांगलें, सांकेतीक निशेध म्हणून कुजिरा महाविद्यालया भायर तांणी भाजप कार्यकर्त्यांक नरकासुराचें म्होवाळें घालून पयशां खातीर सरकारी नोकर्यो विकपी पसरो घालून दिला.
कार्यकर्ते ते उंचेल्या पदावेले फुडारी, पुराय भाजपाचीं यंत्रणां ह्या प्रकरणांत गुंथल्यां. भाजपान हे विशीं कितल्यो पत्रकार परिशदोय घडोवन हाडून वा राष्ट्रीय फुडार्यांक हाडून हाचेर रजांव दिवपाचो यत्न करूंदी. मात ‘आप’ ओगी रावचे नात. तुमचो हो धंदो आमी बंद उडयतलेच, अशें वाल्मिकी हांणी सांगलें.
हो गोंयचे तरणाटे आनी तांच्या फुडाराचो प्रस्न आसा आनी आमी गोंयांचो आनी तरणाट्यांचो फुडार वाट लावपाक दिवचे नात. आपान हो मुद्दो राष्ट्रीय पावंड्यार व्हेलो. आमच्यो दोन मागण्यो आसात आनी ज्यो मेरेन त्यो पुराय जायनात ते मेरेन आमी ओगी रावचे नात, अशेंय नायक हांणी म्हणलें.
ह्या भानगडीची न्यायालयीन चवकशी करची. जे मेरेन हाची स्वतंत्र चवकशी जावची ना ते मेरेन ताची खोलाय कळची ना. ज्या लोकांक अटक केल्यात तें बारीक नुस्तें, पूण जो मेरेन व्हडलें नुस्तें गरयेक लागचें ना तो मेरेन ही भानगड पुरायेन उक्तडार येवची ना. हीं व्हडलीं नुस्तीं आजूनय मेकळीं भोंवतात. गोंय पुलिसांनी स्वता सांगलां, हो स्कॅम २०१४ च्यान चलत आयला आनी तेन्ना सरकार कोणाचें तें सगळ्यांक खबर आसा, सरकाराच्या फाटबळा बगर हो घोटळो जावपाकूच शकना, असो आरोप नायक हांणी केलो.
जे लोक कागाळ दाखल करपाचें धाडस करतात आनी जे अटक जाल्ले दुबावीत मंत्र्यांक वा सरकारी अधिकार्यांक हे पयशे पावतात म्हूण सांगतात जाल्यार तांचेर खटलो चलोवचे सोडून तांकां ‘व्हिसल ब्लोवर संरक्षण अधिनेमा’ खाला राखण दिवपाक जाय. स्वता मंत्री जे अटक जाल्यात तांची मालमत्ता जप्त करपाच्यो आनी कागाळ करतात तांचेर कारवाय करपाची शिटकावणी दिवन तांकां भेश्टयतात, असो गंभीर आरोप नायक हांणी केलो.
जाल्यार आपाचे तरणाटे फुडारी नॅश्विल कुतिन्हो हांणी सांगलें, तो एक बेजारिल्लो बेरोजगार तरणाटो म्हूण हे विशीं मुखार सरला. बरी नोकरी जाय जाल्यार आवय बापूय शिक म्हणटाले. पूण आतां शिकून कांयच फायदो ना. जर शिक्षण आसल्यार नोकरे खातीर लाखांनी रुपया जाय. आमचे आवय- बापूय भांगरा रिणाक दवरून भुरग्यांक शिकयतात. पूण ते भांगर सोडवपाक वतले जाल्यार तांकां जुर भरपाक जायना.
सरकारान बेरोजगार तरणाट्यां खातीर आपली भुमिका जाहीर करपाक जाय. गोंयचो तरणाटो सध्या भिकेक पावला. नोकरी सोडाच गोंयचो तरणाटो रिण काडून वेवसाय करतलो जाल्यारय तांकां कांयच फावो जायना. कित्याक तर थंयूय कमिशना खातीर फिक्सिंग आसता, असो आरोप कुतिन्हो हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
