भांगरभूंय | प्रतिनिधी
‘बिहायंड द बायलायन’ कार्यावळींत सादलो संवादपणजी : पत्रकारितेंत बदल जायत आसा. हाचे फुडें हे बदल नेटान जातलें. चॅनलाच्यो बातम्यो यादींत उरनात. दिसाळ्यांच्या बातम्यांनी पुराय तपशील आसता. हाका लागून दिसाळी उरतलीच, अशें मत ज्येश्ठ पत्रकार र. वि. प्रभुगांवकार हांणी उक्तायलें.
गोंय श्रमीक पत्रकार संघटणेच्या (गूज) बीहायंड द बायलायन कार्यावळींत शुक्रारा ज्येश्ठ पत्रकार र. वि. प्रभुगांवकार हांणी संवाद सादलो. पत्रकार बबन भगत हांणी प्रस्न विचारून तांचे कडेन संवाद सादलो.
पुर्तुगेज राजवटींतल्यान गोंय मुक्त जाले उपरांत प्रभुगांवकार हांणी 1963 वर्सा पत्रकारितेक सुरवात केली. मराठी सयत इंग्लीश दिसाळ्यानी लेगीत तांणी काम केलां. अंदूंचो जीणेगौरव पुरस्कार तांकां फावो जाला.
पत्रकारितेंत औपचारीक शिक्षणा परस विचार, अभ्यास आनी वाचन म्हत्वाचें थारता. मुक्ती उपरांत गोंयांत दिसाळी सुरू जाली. 1963 वर्सा ‘राष्ट्रमत’ दिसाळ्यांतल्यान हांवे पत्रकारितेक सुरवात केली. स. माधव गडकरी हे म्हजें आदर्श आसात. जनमत कौला उपरांत भाऊसायब बांदोडकार हांची राजवटी हांवेन पळयली. भाऊसायब बांदोडकार हे चड शिकूंक नाशिल्ले. तरी लेगीत तांकां लोकांचो तेंको आशिल्लो. समस्येची जाण तांकां आशिल्ली. हाका लागून ते बरे मुख्यमंत्री जाले. गोंय हे ल्हान राज्य आसा. एक जिल्होधिकारी गोंयचो कारभार चलोवंक शकता. धा, बारा मंत्र्यांची गरज ना, हे विचाराचे ते आशिल्ले. हाका लागून गोंय महाराष्ट्रांत विलीन जावचे, अशें तांकां दिसताले. म्हज्या घरांत लेगीत मगोचें वातावरण आशिल्ले. हाका लागून मराठी तशेंच मगोच्या विचारसरणींत हांव व्हड जालो, अशें तांणी सांगलें.
पत्रकारितेंत आतां नेटान बदल जाता. समाज माध्यमांचो प्रभाव वाडत आसलो तरी दिसाळी वा पत्रकारितेक धोको ना. राजकारणा सयत सगळ्या वाठारांनी बदल जायत आसा. गोंय हे ल्हान राज्य आशिल्ल्यान हांगा पक्षांतराक वाव मेळटा. गोंयांत भायले लोक येतात हे खरें आसले तरी 7 ते 8 लाख गोंयकार गोंया भायर रावतात, हे लक्षात घेवंक जाय, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
