चू़क कोणाची ?

भांगरभूंय | प्रतिनिधी

ऑफिसांतल्या कॅन्टिनांत सुधीर आनी निकिता समोरा समोर बसून कॉफी पितालीं. सुधीरान निकिताक म्हळें ,” निकू I want to be your life partner “. निकितान अजाब जावन सुधीराक जाप दिली ,” Sudhir you are already married”. सुधीरान ताका सांगलें ,” I am planning for divorce “. निकितान ताका रागानूच जाप ,” why ? Because of me ?”
सुधीरान ताका आत्मविश्वासान सांगले ,” Yes. I am ready to be with you !”. निकितान ताका रागान म्हळें , ” not possible” जाप दीत तें थंयच्यान उठून गेलें .
रातभर निकिताच्या तकलेन सुधीराची उतरां आपटत आशिल्लीं. ताका कशीच न्हीद पडना जाली . एका अस्तुरेची मठी मोडून आपलो संवसार बांदप‌ योग्य न्हय. मदीच ताका ताची इश्टीण सुप्रियाची उतरां याद आयली. निकिता आनी सुप्रिया एकाच ऑफिसांत काम करतालीं. एकदां निकिता आनी सुप्रिया, लायफ पार्टनर कसो आसचो ह्या विशयाचेर चर्चा करतालीं. तेन्ना सुप्रियान म्हणिल्लें ” ‘‘जो चलो तुजेर मना पासून मोग करता ताचेच कडेन लग्न जावचें “. हीं उतरां निकिताक याद येतकच, ताच्या मनांत विचार आयलो , सुधीर जर म्हजेर मना पासून मोग करता आनी जर म्हजे कडेन लग्न जावंक मेळना म्हूण ताणें आपल्या जिवाचे हाल केले जाल्यार आपूण स्वताक केन्नाच माफ करपाक शकचेंना. चड उशीर जावचे पयली फाल्यां सुधीराक हयकार कळयतां.
दुसऱ्या दिसा निकिता ऑफिसांत पावलें. ताचे दोळे सुधीराक सोदताले. पूण सुधीर ताच्या बसपाच्या जाग्यार दिसनाशिल्लो. सगळो स्टाफ ऑफिसांत आप-आपल्या कामांत व्यस्थ आशिल्लो. अकरा जालीं तरीय सुधीर ऑफिसांत येवंक ना म्हूण निकिताचे काळीज धडधडूंक लागलें. तरेतरेचे वायट विचार ताच्या तकलेंत घोळूंक लागले . तें असवस्थ जालें . खूब वेळान सुधीर ऑफिसांत पावलो. निकिताच्या जिवांत जीव आयलो .
सुधीराक ताची बापोल भयण सिमाचो फोन आयलो . सकाळींच सुधीर आनी ताची बायल कल्पिता सिमाक मेळून आयिल्ली. सिमा वेवसायान दोतोर. सुधीरान फोन घेत सिमाक विचारलें,” दिदी , रिपोर्ट आयलो ?”. सिमान जाप दिली , ” तूं आनी कल्पिता सांजवेळार क्लिनिकांत येयात “. सुधीरान चिंतेस्त जावन सिमाक विचारलें ,” दिदी कितें जालां तें तरी सांग “. सिमान जाप दिली ,” सांजवेळार दोगांय वांगडा येयात मागीर सांगतां “. अशे सांगून दोतोर सिमान फोन दवरलो. पांच मिण्टान , सुधिराची बायल कल्पिताचो फोन आयलो. कल्पितान चिंतेस्त जावन सुधीराक म्हळें ,” जानू , सिमा दिदीन म्हाका फोन केल्लो. रिपोर्ट आयला. दिदी कांयच सांगना “. सुधिरान बायलेक समजायत सांगलें ,” बेबी , आमकां दोगांयकूय वांगडा सांजवेळार यो म्हळां”. कल्पितान बेजारून जाप दिली ,” म्हाकाय तेंच सांगला. इतली वाट हांव पळोवचेंना. तूं आतांच म्हाका व्हरपाक यो “. सुधिरान कितें म्हणचे पयलीच कल्पितान फोन कट केलो . सुधीर मॅडमीक वैजकी इमरजन्सीचे कारण सांगून ऑफिसांतल्यान गडबडीन भायर सरलो ‌. सुधीर गडबडीन भायर सरलो तो पळोवन निकिता मातशे चिंतेस्त जालें.
कल्पिता आनी सुधीर दोगांय डॉ. सिमाच्या क्लिनिकांत पावलीं. सिमान तांकां सांजवेळार आपयल्लीं. दोगांयकूय कॅबिनांत पळोवन, सिमान हांसत फकांडांनी म्हळें,” कितें बाबा ? इतली उत्सुक्ताय ?”. सुधिरान बेजारून डॉ. सिमाक म्हळें ,” दिदी सांग आतां ! “. सिमान खोशी जावन तांकां सांगले ,” Congratulations ! तुमी आवय-बापूय जावपाची आसात. कल्पिता you are Pregnant ! “. दोन वर्सां ही खोशयेची खबर आयकुपाक कल्पिता आनी सुधीर रावतालीं. ही खोशयेची खबर आयकून काळजांतली खोस दोगांयच्या दोळ्यांत चकचकपाक लागली. सुधीरान खोशयेन कल्पिताक घट वेंग मारली. निकिताचे खूब मिस्ड कॉल सुधिराच्या
मोबायलार आशिल्ले . निकिताचे इतले मिस्ड कॉल पळोवन सुधीरान ताका परतून फोन करपाचे बदला ताचो नंबर ब्लॉक केलो .
दुसऱ्या दिसा सकाळीं निकिता ऑफिसाच्या भायर उबें रावन सुधीराची वाट पळयतालें. सुधीर ऑफिसाच्या दारांत पावतकच निकिता धांवत ताच्या फुड्यान गेलें आनी रोखडेंच ताका सांगलें ,” सुधीर I want to marry you “. सुधीरान तिडकेन ताका जाप दिली ,” ल्हेंवटे कशें म्हज्या फाटल्यान लागू नाका. Get out of my life “.
सुधीराची हीं उतरां आयकून निकिताच्या तोंडार जोरान थापट मारिल्ले वरी जालें. ताका धक्कोच बसलो. तें हुंडक्या हुंडक्यानी रडपाक लागलें. इतल्यान ताची इश्टीण सुप्रिया थंय पावलें. सुप्रिया फुड्यान पावतकच निकितान ताका घट्ट वेंग मारली आनी रडपाक लागलें. सुप्रिया ऑफिसाच्या लागींच रावतालें. ताणें निकिताक आपल्या घरा व्हेलें आनी बसपाक सांगलें. ताणें निकिताक विचारलें ,” निकू, शाण्या कितें जालें ?”. निकितान रडत रडत सांगलें ,” तो पाड पडिल्लो म्हज्या फाटल्यान लग्न जावपाक लागिल्लो.‌ हांव तयार जालें आनी आतां म्हणटा हांव ल्हेंवटें कशें ताच्या फाटल्यान लागलां “. सुप्रियान‌ शांतपणान आयकून घेतलें आनी म्हळें ,” निकू , रिलॅक्स डियर “. निकितान रागान सुप्रियाक म्हळ्ळें, “लग्न जाल्ल्या बायलेची सवत जावपाक म्हज्या मनांत नाशिल्लेंच. तुजीं उतरां याद आयलीं आनी तयार जालें “.
सुप्रियान रागानूच म्हळें ,” मदीं हांव कशें आयलें ?”. हाचेर निकितान सांगलें ,” तुंवेंन म्हणिल्लें न्हय गो, जो चलो तुजेर मोग करता ताचेच कडेन लग्न जावंक
जाय. म्हज्या मना विरूद्ध आसून
लेगीत हांवें स्वताक तयार केलें “.
निकिताचे वाक्य आयकून सुप्रियान तिडकीन म्हळें ,” हांवें तुका लग्न जाल्ल्या बायलेची सवत जावपाक सांगूक ना. Get out of my house”. सुप्रियाची हीं उतरां निकिताच्या तकलेर हातोडी मारिल्ले वरी बसली. चू़क कोणाची हो प्रश्न तकलेंत घेवन तें थंयच्यान उठून रडत-रडत चलत रावलें.

श्रद्धा गरड

86694 95781