भांगरभूंय | प्रतिनिधी
भावंडांनो,
चूक ही कोणा कडेन जायना?
सगळेच चुकतात. खासा देव लेगीत आमकां जल्माक घालून चुकला अशें आमचीं कांय जाण्टेलीं आमकां सांगतात. तुमीय तें आयकलां न्हय? भावंडांनो, मनीस कसलीच चूक मुद्दाम जावन करिना. आपूण चुकीचें काम करता वा आपल्या हातांतल्यान चूक घडटली ह्या विचारा सांगाताक रावून मनीस तसो वागना. मनीस खंयचोय जावं, आपले परीन एखादरें काम, वावर करता. तें काम वा वावर करपा फाटलेय हेतू वेगळो, खाशेलो असो आसता. पुणून, जेन्ना तो येवजिल्ल्या प्रमाण जायना वा केल्लें काम, वावर दुसरेच वटेन पावता. ताका येवजिल्ले परस दुसरेंच रूप येता तेन्ना मनशाक आपल्या हातसून चूक घडल्या वा घडटा हें कळटा. तशी जाण ताका येता.
भावंडांनो, हें घडटा केन्ना? जाणांत तुमी? पळयात जेन्ना मनीस खंयच्याय कामाची पूर्व आंखणी म्हळ्यार तें काम सुरू करचे पयलीं कशें करचें हें विशीं मांडणी तकलेंत हाडिना वा त्या कामाची पूर्तताय करपाक आपले तकलेंत आंखणी करिना, सरळ कामाक सुरवात करता तेन्ना अशी गडबड, चूक थंय घडून येता. आतां ही चूक आपल्या हातांतल्यान घडून येवची न्हय जाल्यार मनशाक विचार करून पयलीं मांडणी, आंखणी करून तातूंत मन एका जाग्यार दवरून, शांतीन चित्तान काम करूंक जाय. तें काम करतना तातूंतल्यान आपूण जैताक पावतलोच अशें जिद्दीन तळमळीन वावरूंक जाय. तेन्नाच तें काम बरे रितीन घडून येतलें आनी जैताक पावतलें.
भांवडांनो, अभ्यासाचे बाबतींत अशेंच घडटा. तुमी जर आपलो अभ्यास जाल्लो आसा म्हणून ओगीच रावलीं, मदलो वेळ नाच रंगांत सारलो आनी सरळ परिक्षेक बसलीं जाल्यार तुमी अपेक्षीत धरता तें येस तुमकां मेळचेंना. देखूनच अभ्यासांत खंड घालिनासतना तो सातत्यान करचो. तुमचे कडल्यान चूक जाता ती तुमकां कळचिना. देखून मायेमोगान शिटकायतां, तुमी आतांच सादूर जायात. म्हाका खबर आसा तुमच्यो परिक्षा सध्या चालू आसात. परिक्षेंत अपेस मेळोवपाची चूक तुमच्या हातांतल्यान घडूंक दिवं नाकात.
भावंडांनो, तुमी अपुरबायेचीं भावंडां जाल्ल्यान तुमी म्हजें दरेक उतर आयकतात. देखूनच आतांय बी हांव तुमचे कडल्यान अशीच बरी अपेक्षा धरतां हां. तुमकां बरें जैत बरी भलायकी मागतां येयात तर.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
