भांगरभूंय | प्रतिनिधी
एक नेण्टे चलयेक हुबळी आपोवन (वांगडा इश्टीण गेल्ली) तिका इश्टीणी सयत एके कुडींत दवरपाचो प्रकार हालींच घडलो. एके चलयेची इन्स्टाग्रामा वयल्यान थंयच्या तरणाट्या कडेन इश्टागत जाल्ली. ताका बरी जीण जगपाचें हांयस दाखोवन ताणें भांगराच्यो वस्ती हाडपाक प्रवृत्त केलें. मागीर ही चली इश्टीणीक घेवन हुबळी गेली आनी त्रासांत पडली. घरच्यांनी कागाळ केल्ल्यान पुलिसांक वेळारुच हालचाल करपाक मेळ्ळी. 19, 20 वर्सांच्या दोग तरणाट्यांक अटक जाल्या. हें फक्त मोगाचें प्रकरण काय आनीक कितें, ताचो तपास पुलीस करतात. तांचेर आगळीक जाल्ली आसल्यार वेगळीं कलमां लायतले. कारण दोनूय चलयो पिरायेन ल्हान आसात. ह्या प्रकरणाक सोशल मिडियाय जापसालदार आसा, हाचे कडेन आडनदर करपाक मेळची ना.
आतां सातवे- आठवे यत्तेंत शिकपी भुरगीं पसून सोशल मिडियाचे भकीक पडल्यांत, वराचीं वरां तीं तातूंत घुस्पल्लीं आसतात. पयलीं पाय निसरलो काय हो सिनेमाचो प्रभाव म्हणटाले. मात, आतां सगलें विश्वूच हातांत आयलां. पळोवपा सारकें बरें खूब कितें आसा, पूण जुंवानपणाचे मेरेर उबे आशिल्ले तरणाटे चले, चलयो नाका जाल्लें पळोवपाक लागल्यात. नटांचें अनुकरण करपाक लागल्यात. चडशे कलाकार हे सुशिक्षीत, पयशेकार घरांतले आसतात. अभिनय करपाक ते रातदीस मेहनत घेतात. अनुकरण करपाचेंच आसा जाल्यार तांचे मेहनतीचें, कलागुणाचें करचें. कपड्यांचें न्हय. वयांत आयिल्ल्यो बऱ्योच चलयो शिटूक आसतात. मात हुबळी गेल्ले हे चलयेक सारासार विचार करपाची तांक घडये आसची ना. मोग कुड्डो आसता. तरीय मोगी नेमको कितें करता, ताचो सभाव, फांटभूंय तपासपाक जाय. बरो दिसता आनी पयशेकार म्हूण आकांतवाद्याच्या मोगांत पडिल्ल्यो एक- दोन अभिनेत्री आसात. मागीर पश्चाताप करून फायदो कितें? सिनेमांत पड्ड्याचेर दिसता तें आनी प्रत्यक्ष जीण हातूंत जमीन- अस्मानाचो फरक आसता, इतलेंय हालींचे हुशार पिळगेक खबर ना? हातूंतलो एक चलो गोंयांत येवन ते चलयेक मेळून गेला. तिचे इश्टीणीकूय ताची वळख आसतली. वस्ती चोरून व्हरप हो गुन्यांव हें तांकां खबर ना? परकी गांवांत गेल्यार थंय धोको जावं येता, हाची भिरांत तांकां दिसली ना? हालींचे भुरगे पेपर वाचिनात, खबरो पळयनात. निदान मोबायल फोनाचेर ई- पेपर, सोशल मिडिया वयल्यो खबरो तांणी वाचूंक जाय. म्हणटकच जगांत कितें चलता, तें कळटलें, शितिदान पावल घालूंक मेळटलें. मुखार धोको आसा, हें कळटलें. कसलेय गजालीचे मुखार परिणाम कितें जावं येतात, हें तरी प्रत्येक तरणाट्याक खबर आसूंक जाय.
पालकांनी भुरग्यांचेर संस्कार करपाक जाय, तांचेर लक्ष दवरपाक जाय, असो युक्तीवाद जायते जाण करतात. मात, नोकरेक वचपी वा हेर पालक 24 वरां भुरग्यांचेर लक्ष दवरपाक शकनात. तीन चलयो (वा चले) ट्युशनाक वता, म्हूण सांगून भलतेच कडेन गेल्यार कोणाक कशें कळटलें? हे बाबतींत समाजानूय जागृत रावप गरजेचें. हालीं मोबायल फोन प्रत्येकाच्या हातांत आयिल्ल्यान कोण कितें करता, तें कोणाकूच कळना. घर, नातें विस्वासाचेर चलता. पूण, पावल वाकडें पडपाक एक खीण पुरो. फक्त मोगाचे बाबतींत न्हय, तर गुन्यांवांचे बाबतींतूय. विनयभंग, ड्रग्स, चोरी…. कितेंय घडूं येता.
संस्कार केल्यार मनीस सुदारता अशें कांय जाण खात्रेन सांगतात. पूण ते मुळांत आसचे पडटात. सरभोंवतणची परिस्थिती, मनशाक आयिल्ले अणभव हातूंतल्यान ताचेर संस्कार जातात. ‘फाल्यांच्यान फट मारपाची ना’, ‘कोणाचोच दुस्वास करपाचो ना’, ‘कसलीच चोरी करपाची ना’…. अशें सांगलें म्हूण तो भुरगो तसो वागतलोच, हाची खात्री दिवंक मेळचीना. तशें जाल्लें जाल्यार पुराय संवसार प्रामाणीक, सोबीत जावपाचो. सरभोंवतण सोडात, आवडट्या मोबायला वयल्यो सोशल मिडिया सायटी पळोवच्यो, म्हणटकच साबार लोकांचे तरातरांचे विचार कळटले. हे लोक शिकूंक नात? तांचेर संस्कार जावंक नात? प्रतिश्ठीत, सुशिक्षीत लोक संस्कार नाशिल्ले भशेन वागतात, मागीर हेरांची कितें गजाल?
तरणाट्यांचें काम उंचेलें शिक्षण घेवपाचें, बरी नोकरी मेळोवपाचें. मोग आपशीच जाता. तरीय तो डोळसपणान करचो. सपनां पळोवचीं, पूण तीं प्रत्यक्षांत हाडपाक कश्ट करचे. सोशल मिडियाचेर कोणतरी मेळ्ळो/ मेळ्ळें आनी तो/तें सांगता तशें करीत रावले जाल्यार ताची ‘हुबळी’ जावपाक वेळ लागचो ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
