भांगरभूंय | प्रतिनिधी
घरांतलें लायटीचें बिल भरूंक ना जाल्यार वीज खातें रोखडेंच कनेक्शन कापता, भाडें भरूंक ना जाल्यार घरधनी बिराडकाराक धांवडावन घालता. पयशे दिवंक ना जाल्यार वेपारी म्हाल दिनात….. सगले कडेन अशेंच घडटा. मात पालिका, पंचायतींच्या दुकानांनी, मार्केटांनी भाडें भरात वा ना भरात तुमकां कसलीच भिरांत ना, अशें चित्र आमच्या गोंयांत तरी पळोवंक मेळटा. कांय कडेन म्हयन्याचे म्हयने लायटीचीं बिलां भरुंक नात, तरीय कित्याक कोण जाणां वीज खातें तांचें कनेक्शन कापिना. उदकाचेंय तशेंच. कांय कडेन वेपाऱ्यां खातीर नवीं मार्केंटां बांदल्यांत, मात थंय वचपाक वेपारी सुरवातेक फाटीं फुडें जाल्यात. मागीर तांकां फोर्सान थंय धाडचे पडल्यात. राज्यांत मार्केटाच्या अश्यो 1- 2 इमारती आसात, ज्यो वर्साचीं वर्सा वापराविणें पडून आसात. हातूंत वेपारी आनी पालिका- पंचायत आपली कांयच चूक ना, अशें सांगता. थोडे न्यायालयांत वतात. पूण मूळ मुद्दो थंयच उरता आनी लोकां कडल्यान घेतिल्ल्या करांतले लाखांनी रुपया खर्च करून बांदिल्ली ती इमारत तशीच एकसुरी भूतबंगलो कशी उरता. स्वराज संस्थांची येणावळ बुडटा. उदगतीच्या कामांचेर परिणाम जाता.
आतां पणजे म्हापालिकेन 400 वेपाऱ्यांक नोटिशी काडल्यात. मार्केटांतले हे वेपारी. तांणी बरींच वर्सां भाडें भरूंक ना. देखून तांकां तें सात दिसां भितर भरपाक सांगलां. नाजाल्यार जागो सोडपाची ओर्द दिल्या. मजेची गजाल म्हणल्यार दरवर्सा म्हापालिका कारवाय करपाची शिटकावणी दिता. मात सदचे भशेन आपूणच ताचे कडेन आडनदर करता. अर्थांत ताचे फाटल्यान कितें तरी कारणां आसतलींच. आतां हे खेप कितें जाता, ताचे कडेन सगल्यांचेंच लक्ष आसतलें. पोरूं लायटीच्या बिला वयल्यान, नितळसाणेच्या बिलां वयल्यान वाद जाल्लो. दर म्हयन्याक नेमान भाडें एकठांय करपाची गरज आसता. मात, म्हापालिका (वा राज्यांतल्यो हेर पालिका, पंचायती) ताचे कडेन आडनदर करतात. उपरांत रक्कम फुगतकच ती भरपाक वेपाऱ्यांक जमना. तेय आपूण जावन दर म्हयन्याक भाडें भरपाक वचनात. तातूंत बरींच दुकानां विकत घेतल्यात एकल्यान, भाड्यान दिल्यात दुसऱ्याक आनी ताणें चलोवपाक दिल्यांत तिसऱ्याक. मूळ धनयाक भाडें, लायटीचें बील फारीक केलां काय ना, तें पसून खबर आसना. नांवाचेर दुकान वा कनेक्शन आसल्यार बील येतकच ताका कळटा. हे प्रकार कायदेशीर काय बेकायदेशीर तें स्वराज्य संस्थांनी, तांचेर नियंत्रण दवरपी सरकारी यंत्रणांनी एकदां थारावंक जाय. वर्सभर न्हिदून रावप आनी जाग आयली काय मागीर कारवाय केल्ले सारकी लोकांक दाखोवप. हांव मारिल्ले सारकें करता, तुमी रडिल्ले सारकें करात. एकूणच हो प्रकार दोगांयच्या मान्यतायेन चलता, सगलेच हातूंत सामील आसात, अशें थोड्या जाणकारांक दिसता. भाडें, बिलांच्या प्रस्नां वयल्यान सत्ताधारी आनी विरोधी नगरसेवकां मदीं वाद पसून जाल्यात. तातूंत थोडे वेपारी लोकप्रतिनिधींचे लागींचे मतदार. म्हणटकच कारवायेच्या बोमाड्यांतली हवा फुस्स करून खंयचे कडेन नाच्च जाली जाल्यार अजाप न्हय.
थोड्या गोंयकारांनी तशेंच कर्नाटक, अस्तंत, उत्तर भारतांतल्यान येवन गोंयांत स्थायीक जाल्ल्या वेपाऱ्यांनी पणजे मार्केटांत वेवसाय सुरू केल्यात. तातूंतल्या चारशे जाणांनी फाटल्या 10 ते 12 वर्सांचें भाडें भरूंक ना. ही रक्कम कांय कोटी रुपया आसा. ही रक्कम एकठांय करपाची जापसालदारकी पालिकेच्या खंयच्या विभागाची वा अधिकाऱ्याची? चवकशी केल्यार वेपाऱ्यांनी भाडें कित्याक भरूंक ना, ताचे फाटलें कारण उक्तडार येतलें. इतलीं वर्सां म्हापालिका भाडें घेनासतना कित्याक ओगी रावली? काय कोणा लोकप्रतिनिधीचो वेपाऱ्यांक आशिर्वाद बी आशिल्लो? आदले म्हापौर उदय मडकयकार हांच्या काळांत भाडें वसूल करून ते संबंदीची कबलातूय जाल्ली. मात उपरांत ही प्रक्रिया संथ जाली आनी सगलेंच थंड जालें, अशें आतांचें चित्र पळयल्यार दिसता. म्हापालिकेक वेपाऱ्यां कडेन उण्या काळा खातीर भाडें, दुकानाची मालकी हाचे संबंदी कबलात करपाक जाय. तर चडश्या वेपाऱ्यांक चड काळा खातीर कबलात जाल्ली जाय. ताका लागून ते वेळार भाडें भरिनात अशें कळटा. कबलातीची मुजत सोंपली काय म्हापालिका भाडें वाडयतली अशें बी वेपाऱ्यांक दिसता काय? चड काळाची आसूं वा उण्या, नेमान भाडें भरपाक जाय, बिलां फारीक करपाक जाय, अशें कायदो सांगता. वेपाऱ्यांक नोटीस काडल्या, हाचो अर्थ म्हापालिकेन फाटलीं 10 वर्सां तांकां मुफत दुकानां दिल्यांत. आतां भाडें खरेंच वसूल जातलें, काय नोटीस व्हांवन मांडवींत वतली? तशें जावंक फावना. ही नोटीस खरी, अस्सल…. ती चुट्टेचो सोरोप न्हय, हें म्हापालिकेक हे फावट तरी सिद्ध करपाक जमतलें व्हय?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
