भांगरभूंय | प्रतिनिधी
खबरां संस्था
न्यूयॉर्कः अमेरिकन उक्ते टॅनीस सर्तींत पोरूंचो उपजैतिवंत कॅस्पर रूड हाका दुसरे फेरयेंत सर्तींतल्यान भायर वच्चें पडलें. चीनाच्या झँग झिझेनान
इतिहासीक जैत मेळयतना पांचवो सिडेड रुडकाक 6-4, 5-7,6-2, 0-6,6-2 अशें हारयलें. एटीपी क्रमवारींत पयल्या पांचात आशिल्ल्या खेळगड्याक हारोवपी झँग व्हो पयलो चीनी खेळगडो थारलो. फुडले फेरयेंत ताका ऑस्ट्रेलियेच्या रिंकी हिजिकाटा कडेन खेळचें पडटलें. झँगान फाटल्या जून म्हयन्यांत जाल्ले फ्रेंच उक्ते टॅनीस सर्तींत तिसरे फेरयेंत प्रवेश मेळयल्लो. रुडान ताका फाटल्या स ग्रँडस्लॅमातल्यान तिनांत निमणे फेरयेंत प्रवेश केल्लो. ताका लागून झँगाची कालची कामगिरी नांव घेवपा सारकी थारल्या.
सातवो सिडेड स्टेफानोस त्सित्सिपासाक हार खावची पडली. पात्रताय फेरींत जैत मेळोवपी स्वित्झर्लंडाच्या डॉमिनिक स्टिकरान ताका 7-5, 6-7, 6-7, 7-5, 6-3 अशें हारयलें. दुसरो सिडेड नोवाक जोकिविचनान मात आपले जैताची दौड कामय दवोरल्या. ताणे स्पेनाच्या बर्नाबे जापाटाक मिरालेसाचेर 6-4, 6-1, 6-1 अशें जैत मेळयलें.
बायलां मदीं टॉप सिडेड पोरूंची वस्ताद पोलंडाच्या इगा श्वीऑनटेकान ऑस्ट्रेलियेच्या दारिया साविलेक 6-3, 6-4 अशें हारयलें. जाल्यार 2009 वर्सा उपजैतिवंत थारल्ल्या कॅरोलिना वॉझनियाकीक दोन फावट विम्बल्डन जैतिवंत पेट्रा क्विटोवाक 7-5, 7-6 अशें हारयलें. ताचे पयलीं अमेरिकेच्या सव्या सिडेड कोको गॉफान रशियाच्या 16 वर्सा पिरायेच्या मीरा आंद्रीव्हाक 6-3, – 6-2 अशें हारोवन फुडले फेरयेंत प्रवेश केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
