भांगरभूंय | प्रतिनिधी
भारताचो शेजारी आशिल्लो पूण भारताक सदांच उणाक पळोवपी चीन सेगीत कसली ना कसली तरी खोड काडून दोनूय देशां मदलो तणाव कायम वाडयत आसता. हें आतांच न्हय जाल्यार 1962 सावन अशेंच चालू आसा. 1962 वर्सा भारता कडेन इश्टागतीचो हात मुखार करून हिंदी चीनी भाई भाई अशें म्हणत ताणें भारताचो केंसान गळो कापलो. उपरांतूय ताणें भारताच्यो सेगीत खोडी काडून भारताक त्रास दिला. केन्ना ताणें भारतांत घुसखोरी केली जाल्यार केन्ना ताणें शिमेर नवीं गांवां वसयलीं. जाल्यार केन्ना ताणें भारतांतल्या गांवांक चीनी नांवां दिवन तीं गांवां चीनाचे हद्दींत आशिल्ल्याचो दावो केलो. अर्थांत चीनाच्या ह्या दाव्याक वा खोडसाळपणाक भारतान केन्नाच भीक घाली ना. तरी लेगीत ताच्या ह्यो खोडी उण्यो जाल्यो नात. उरफाटें वाडतूच गेल्यो.
फाटल्या वर्सा चीनान भारतांतल्या लडाख आनी अरुणाचल प्रदेशांतल्या कांय गांवांक चीनाच्या नकशांत दाखयिल्लें. ह्या नकशांत ताणें भारतातलें लडाख आनी अरुणाचल प्रदेशांतल्या कांय गांवांक चीनांत दाखयिल्लें. इतलेंच न्हय जाल्यार त्या गांवांक चीनी नांवां लेगीत दिल्लीं. चीनाच्या ह्या कर्तुबाची भारतान रोखडीच दखल घेवन ताचो निशेध केल्लो. भारताच्या निशेधा उपरांतूय चीन भारताच्यो खोडी काडप बंद करिना हें परतून एकदां सिद्ध जालें.
ह्या वेळार चीनान भारताच्या लडाखांत दोन नव्या कावंट्याची घोशणा करून घुसखोरी केली. पंदरा दिसां पयलींच भारताच्या हें लक्षांत आयलें आनी भारतीय लश्करान आनी विदेश मंत्रालयान हाची चीनाक जाप विचारल्या. चीन इतल्यारूच थांबूक ना. चीनान आतां भारता कडेन वॉटर वाॅर सुरू केलां. चीनान ब्रह्मपुत्रा न्हंयचेर मोटो उदका प्रकल्प सुरू केला. ह्या उदका प्रकल्पाक लागून भारताक फुडारांत व्हड प्रमाणांत उदकाच्या संकश्टाक सामकार वच्चें पडटलें. दुसऱ्याची कळ काडून मजा पळोवपाची चीनाची पोरणी संवय आसा. अश्यो खोडी तो भारताचीच काडटा अशें न्हय जाल्यार हेर देशांचीय तो काडीत आसता. पूण आशिया खंडांतल्या चड करून भारताच्या शेजरा आशिल्ल्या कांय देशांक ताणें व्हड प्रमाणांत रीण दिवन जाल्यार कांय देशांक धाक दाखोवन ओगी केल्यात. भारत मात ताच्या ह्या कर्तुबांक बळी पडना म्हणून तो अशो खोडी अदीं मदीं काडीत आसता.
भारताच्या अरुणाचल प्रदेशाचेर आनी लडाखाचेर चीनाचो दोळो आसा. इतलेंच न्हय जाल्यार अरुणाचल प्रदेश हो आपलोच भूंय वाठार आशिल्ल्याचो दावो चीनान खूब फावटी केला. फाटल्या वर्सा चीनांतल्या झाऊझंग हांगा जाल्ल्या खेळां सर्तींत भारतान खेळपाक न्हयकार दिलो. त्या वेळार चीनान अरुणाचल प्रदेशांतल्या खेळगड्यांक स्टेपल व्हिसा दिल्लो. स्टेपल व्हिसा दिवन ताणें एके तरेन भारताची कळ काडिल्ली. ताचे आदीं लडाखांत चीनी सैन्य घुसयिल्लें. तेन्ना दोनूय देशांतलें सैन्य एकामेकां मुखार उबें राविल्लें. केन्नाय झुजाक तोंड फुटूंक शकता अशी परिस्थिती निर्माण जाल्ली. त्या वेळार जाल्ले धुमश्चक्री उपरांत चीनी सैन्य भारताचे शिमेंतल्यान गेल्लें. पूण शिमेर तांच्यो हालचाली सेगीत चालूच आसतात.
मुळांत चीन हो संवसारांतलो सगल्यांत कपटी देश आसा. चीनाक संवसारांतली महासत्ता जावपाचें आसा. ते खातीर ताणें विस्तारवादी भुमिका स्विकारल्या. ताका लागूनच तो शेजारच्या देशांची जमीन आनी मालमत्ता बळकायत आसा. ताच्या ह्या विस्तारवादी धोरणाक जर कोणूय आडकाठी हाडीत आसा जाल्यार तो भारत हें चीन जाणून आसा. म्हणूनच तो भारताच्यो अश्यो अदीं मदीं खोडी काडून भारताक त्रास दीत आसता. अर्थांत ताच्या ह्या कर्तुबांक भारत आतां केन्नाच बधचो ना. कारण आयचो भारत हो 1962चो भारत नासून 2025चो भारत आसा. चीनाचे आरे हाका कितेंरे करपाची धमक ह्या भारतांत आसा. ताका लागूनच भारता कडेन सरळ मार्गान येनासतना आडमार्गान ल्हान व्हड खोडी काडून भारताक त्रास दिवपाचें धोरण चीनान आपणायलां.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
