भांगरभूंय | प्रतिनिधी
चीन, खबरां संस्था ः संवसारांतल्या सगळ्यांत चड लोकसंख्या आशिल्ल्या देशांत भारत आनी चीन ह्या दोन आशिया खंडातल्या देशांचो आस्पाव आसा. पूण हालीं जाहीर केल्ल्या आंकडेवारी प्रमाण चीनाची लोकसंख्या सेगीत तिसऱ्या वर्सा उणी जाल्या. चीन सरकारान शुक्रारा हे विशीं म्हायती दितना सांगलें, संवसारांतलो दुसरो सगळ्यांत चड लोकसंख्या आशिल्ल्या चीना मुखार आतां फुडाराक लोकसंखे संबंदी आव्हानां आसात. सध्या चीनाक वाडत वचपी जाण्ट्यांची लोकसंख्या आनी काम करपी लोकांचो उणाव ह्या आव्हानांक तोंड दिवचें पडटा.
चीनाची लोकसंख्या 2024 वर्साच्या निमाणे मेरेन 1.408 अब्ज नोंद जाल्या. जी फाटल्या वर्सा परस 1.39 दशलक्ष उणी आसा. विशेश म्हळ्यार चीनांत अंदूं सुमार 9.54 दशलक्ष भुरगीं जल्माक आयल्यात, फाटल्या वर्सा परस हो आंकडो 5 लाख 20 हजारान चड आसा. चीनी राशींत भुरग्यांक जल्म दिवपाखातीर इयर ऑफ ड्रॅगन हें शुभ वर्स मानतात देखून ही संख्या वाडली आसूं येता अशें म्हण्टात.
नेमकें कारण कितें?
लोकसंख्या उणी जावपाचीं कारणां सगळ्या प्रकरणांत सारकींच आसात. जिणेचो खर्च वाडपाक लागून जायते तरणाटे लग्न करपाक आनी भुरग्यांक जल्म दिवपाक टाळतात. तरणाटे लग्न आनी भुरग्यां परस चड शिक्षण आनी करिअर वाडपाचेर चड लक्ष केंद्रीत करतात. लोक चड काळ जियेतात पूण जल्म दर वाडोवपाक हें पुरो ना.
मजगतीं, जपान आनी हेर उदेंत युरोपी देशांनी लोकसंख्या नेटान उणी जायत आसा, तातूंत आतां चीनाचो आस्पाव जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
