भांगरभूंय | प्रतिनिधी
नवी दिल्ली, खबरां संस्था ः अमेरिकन दिग्गज कंपनी ॲपल कंपनीन भारतांत आयफोन तयार करपाच्या मळार व्हड पावल उबारलां. हाका लागून चीनाक व्हड धक्को बसला. अमेरिकेन आपलो ॲपल ॲसेंबल प्लांट चीनांतल्यान भारतांत व्हेल्या उपरांत अशें घडलें. फाटल्या वर्सा ॲपलान सुमार 22 अब्ज डॉलर (1.2 कोटी रुपया) आयफोन तयार केले. भारत आतां ॲपल फोन उत्पादनांत ग्लोबल हब जालां.
ॲपलाच्या उत्पादनांत भारतान बरीच उजरगत केल्या. फाटल्या वर्सा ॲपल आयफोन कंपनीन सुमार 22 अब्ज डॉलर (1.2 कोटी रुपया) आयफोन तयार केल्लें. हें उत्पादन ताचे आदींच्या वर्साचे तुळेंत 60 टक्क्यां परस चड आसा. आतां भारतांत ‘मेक इन इंडिया’ खाला आयफोन तयार करपाचें काम सुरू आसा. फेब्रुवारींत ‘रेसिप्रोकल’ टॅरिफ येवजण खाला घोशणा जाले उपरांत भारतांतल्यान अमेरिकेंत आयफोनाची शिपमेंट नेटान वाडल्या.
20 टक्के उत्पादन आतां भारतांत
अॅपल कंपनी आतां संवसारभर विकपी दर 5 आयफोनांतलो 1 आयफोन भारतांत तयार करता. हाचो अर्थ आयफोन उत्पादनांतलें 20 टक्के उत्पादन आतां भारतांत जाता. सरकार लेगीत ‘मेक इन इंडिया’ खाला भारतांत ह्या फोनांचें उत्पादन वाडयता. अॅपल आनी ताचे पुरवणदार फॉक्सकॉन, विस्ट्रॉन (सद्या टाटाचे मालकीचे), आनी पेगाट्रॉन ह्या सगळ्यांक आतां चीनाच्या बदलाक भारतांत आयफोन तयार करपाची आवड आसा. देखून आयफोनाचें उत्पादन नेटान वाडत आसा.
भारतांत आयफोन खंय तयार जाता?
भारतांतले आयफोन सगळ्यांत असेंबलिंग दक्षीण भारतांतल्या फॉक्सकॉनच्या फॅक्टरीत जाता. ते भायर भारतांत विस्ट्रॉनाचो वेवसाय आपल्या हातांत घेतिल्ल्या टाटा इलॅक्ट्रॉनिक्सांत आयफोन तयार करपाचें काम सुरू आसा. देखून भारतांत आयफोनाचें उत्पादन वाडत आसा.
आतां भारतांत आयफोनाचें उत्पादन फकत देशांतल्या बाजारपेठे मेरेन मर्यादीत ना. आतां हें उत्पादन संवसारभरांत, खास करून अमेरिकेंत नेटान पावपाक लागलां. 8 एप्रीलाक देशाचे आयटी मंत्री अश्विनी वैष्णव हांणी स्पश्ट केलें की, ॲपलान मार्च 2025 मेरेन सुमार 1.5 ट्रिलियन रुपयांचें आयफोन भारतांत निर्यात केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
