भांगरभूंय | प्रतिनिधी
केंद्रीय भलायकी मंत्रालयान घेतली जोड देखरेख गटाची बसका
नवी दिल्ली, खबरां संस्था: फाटल्या कांय सप्तकां पसून चीनांत स्वासा कडेन संबंदीत दुयेंसांच्या वाडपी प्रकरणांचे फाटभूंयेर भलायकी आनी कुटूंब कल्याण मंत्रालयाच्या फुडारपणा खाला भलायकी सेवा महासंचालनालयाच्या (DGHS – Directorate General of Health Services) अध्यक्षते खाला आयज जोड देखरेख गटाची (JMG) बसका जाली. संवसारीक भलायकी संघटना (WHO), आपत्ती वेवस्थापन विभाग, एकात्मीक रोग संनिरीक्षण कार्यावळ (Integrated Disease Surveillance Programme – IDSP), राष्ट्रीय रोग नियंत्रण केंद्र, भारतीय वैजकी संशोधन परिशद (ICMR), आपत्कालीन वैजकी मजत विभाग आनी दिल्लीच्या एम्स म्हळ्यार अखिल भारतीय आयुर्विज्ञान संस्था (AIIMS) हॉस्पिटला सयत हेर हॉस्पिटलांतले तज्ञ प्रतिनिधी हे बसकेंत वांटेकार जाले.
हे बसकेंत सविस्तर चर्चा केल्या उपरांत आनी सध्या उपलब्ध आशिल्ले म्हायतीचेर आदारीत कांय मुद्यांचेर हाजीर आशिल्ल्या प्रतिनिधींचें एकमत जालें, हे मुद्दे अशे आसात:
-फ्लू सारकिल्ल्या व्हायरस संसर्गाचो सध्याचो हंगाम पळयल्यार चीनांतली सध्याची परिस्थिती असामान्य ना. हे संबंदी उपलब्ध आशिल्ल्या अहवाला प्रमाण आरएसव्ही आनी एचएमपीव्ही ह्या रोगजन्य व्हायरसांचो संसर्ग जाल्ल्यान हांगा श्वसन संबंदीत दुयेंसांची वाड जाल्ल्याचें ह्या हंगामांत चड प्रमाणांत दिसून आयलां.
-भारत सरकार सगळ्या उपलब्ध स्रोतां वरवीं थंयचे परिस्थितीचेर बारीकसाणेन नदर दवरता. तशेंच चीनांतल्या परिस्थिती विशीं वेळावेळार अद्ययावत म्हायती वांटपाची मागणी संवसारीक भलायकी संघटणेकय केल्या. वयर सांगिल्लो व्हायरस सध्या भारता सयत संवसारभर पातळ्ळा.
-सध्या भारतांत इंडियन कावन्सील ऑफ मेडिकल रिसर्च आनी इंटिग्रेटेड डिजीज पळोवणी कार्यावळीच्या दोनूय विस्तारीत प्रणालींवरवीं इन्फ्लूएंझा व्हायरस संसर्गजन्य दुयेंसां (ILI) तशेंच खर आनी तीव्र श्वसन संसर्ग हांचे खातीर घटमूट पळोवणी पद्दत आदीं सावनूच आसा. हे संबंदी दोनूय संघटनांनी दिल्ले आंकडेवारींत देशांत इन्फ्लूएंझा व्हायरस संसर्गजन्य दुयेंस (ILI) आनी खर आनी तीव्र श्वसन संसर्ग हांच्या प्रकरणांत कसलीच असामान्य वाड दिसूंक ना.
-फकत हंगामांतले बदल अपेक्षीत सोडल्यार फाटल्या कांय सप्तकांत देशभरांत स्वास घेवपाच्या दुयेंसाच्या दुयेंतींचो आंकडो वाडूंक ना अशें वेगवेगळ्या हॉस्पिटलांतल्या दोतोरांनीय स्पश्ट केलें.
-इंडियन काउन्सिल ऑफ मेडिकल रिसर्च हे संस्थेचे देशभराचे पद्दतीन एडेनोव्हायरस, आरएसव्ही, एचएमपीव्ही हे स्वास घेवपाचे रोग निर्माण करपी वेगवेगळ्या प्रकारांच्या व्हायरसांचीय चांचणी केल्या. त्या सगळ्या नमुन्यांच्या चांचण्यांनीय ह्या रोगजंतू निर्माण करपी व्हायरसांच्या केशींनी असामान्य वाड दिसूंक ना. तशेंच सध्याचे परिस्थितींत खबरदारीचो उपाय म्हूण वैजकी संशोधन मंडळ देशभरांतल्या एचएमपीव्ही चांचणी प्रयोगशाळांचो आंकडो वाडयतली आनी ह्या सगळ्या यत्नांतल्यान वैजकी संशोधन मंडळ येवपी काळांत एचएमपीव्हीच्या प्रवृत्तीचेर बारीकसाणेन नदर दवरतली.
-देशभरांत हालींच पूर्वतयारे कडेन संबंदीत प्रात्यक्षिकां जालीं. तातुंतल्यान मेळिल्ले म्हायतीच्या अभ्यासांतल्यान अशें दिसून आयलें, जर देशांत श्वासा कडेन संबंदीत दुयेंसांच्या प्रकरणां मदीं वाड जाल्यार अशे परिस्थितीक तोंड दिवपाक भारत पुरायेन तयार आसा.
-देशाचीं भलायकी यंत्रणां आनी देखरेखी संबंदीत देशभरांत विस्तारिल्ली वेवस्था पुरायेन सतर्क आसा. हाचे वरवीं देश अचकीत येवपी खंयच्याय संकश्टांक आनी आव्हानांक तोंड दिवपाक सज्ज आशिल्ल्याचें सुनिश्चीत करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
