भांगरभूंय | प्रतिनिधी
बिजींग, खबरां संस्था ः भारताच्या शेजारच्या देशांत चीनांत आनीक एक व्हड भांगराचो सांठो सांपडलो. चीनाच्या सैमीक संसाधन मंत्रालयाच्या म्हणण्या प्रमाण, गान्सू प्रांत (वायव्य चीन), इनर मंगोलिया (उत्तर चीन) आणि हेलोंगजियांग प्रांत (ईशान्य चीन) हांगा हो भांगराचो सांठो सांपडला. वट्ट 168 टन भांगर आशिल्ली ही खण आसा. टायम्स नाऊन हे विशीं खबर दिल्या.
हळडुव्या धातूचें वट्ट प्रमाण 168 टन आशिल्ल्याची म्हायती चीन माध्यमांनी दिल्या. फाटल्या वर्सां नोव्हेंबरांत चीनान हुनान प्रांतांत संवसारांतलो सगळ्यांत व्हडलो भांगराचो सांठो सोदून काडून संवसाराचें लक्ष ओडून घेतिल्लें. पिंगजियांग काउंटी लागसार आशिल्ल्या वाठारांत उंचेल्या दर्ज्याचो सुमार 1 हजार मेट्रीक टन भांगर सांपडलें. ताचें मोल 83 अब्ज डाॅलर (सुमार 7 लाख कोटी रुपया) परस चड आसा. हो उल्लेखनीय सोद दक्षीण आफ्रिकेंतल्या दक्षीण खोल खणी परस चड आसा. ही खण पयलीं सगळ्यांत व्हडली खण आशिल्ली. तातूंत 900 मेट्रीक टन भांगर आशिल्लें. फोर्ब्साच्या अहवाला प्रमाण, सगळ्यांत चड भांगराचो सांठो आशिल्ले तीन मुखेल देश म्हळ्यार अमेरिका, जर्मनी आनी इटली.
2,264 टन भांगराच्या सांठ्या सयत चीन सव्या क्रमांकाचेर आसा. भारतांत 840. 76 टन भांगर आसा. संवसारांतल्या भांगराच्या उत्पादनांत संवसारांतलो मुखेल भांगर उत्पादक देश म्हूण चीनान आपली सुवात तिगोवन दवरल्या. सुमार 375 टन उत्पादनां सयत चीनांत व्हड प्रमाणांत खण काम जाल्ल्यान 2022 वर्सा संवसारीक भांगराच्या उत्पादनांत चीनाचो 10 टक्के वांटो आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
