भांगरभूंय | प्रतिनिधी
देशांतल्या उत्पादनाक चालना दिवपाक गुंतवणूक म्हत्वाची
नवी दिल्ली, खबरां संस्था ः शिमेचेर जाल्ल्या लश्करी संघर्शाक लागून आतां कांय काळा सावन चीना कडेन भारताचे संबंद इबाडल्यात तरी अर्थसंकल्पा पयलींच्या अर्थीक सर्वेक्षणाच्या अहवालांत मात देशांत चीनांतल्यान थेट परकी गुंतवणूक वाडोवपाचेर भर दिला. देशांतल्या उत्पादन क्षेत्राक चालना दिवपाक आनी निर्यात संद वाडोवपाक चीनांतली गुंतवणूक म्हत्वाची थारतली अशें अहवालांत म्हणलां.
चीनाच्या उत्पादन क्षेत्राचेर आपलें अवलंबन उणें करपा खातीर अमेरिका आनी युरोपांनी पावलां उबारल्यांत. देखून चीनी कंपनींनी भारतांत गुंतवणूक करून आपलीं उत्पादनां अमेरिकेंत आनी युरोपीय बाजारांत निर्यात केल्यार फायद्याचें थारतलें. शेजारच्या देशांतल्यान उत्पादनां आयात करपा परस हो पर्याय बरो थारतलो. चीनाच्या ‘प्लस वन’ धोरणाचो भारताक फायदो जावंक शकता.
चीना कडेन भारताची वेपारी तूटय वाडत आसा. देखून चीनांतल्यान थेट परकी गुंतवणूक वाडल्यार ही तूट उणी करपाक मजत जातली. चीनांतल्यान वाडिल्ल्या गुंतवणुकेक लागून संवसारीक पुरवण साखळींत भारताचो वांटो वाडटलो आनी निर्यात वाडटली अशें अहवालांत म्हणलां.
चीन 22वे सुवातेर
सध्या देशांत जावपी थेट परकी गुंतवणुकीच्या वेव्हारांक एफडीआय वरवीं आपोआप मंजुरी मेळटा. पूण भारताचे शिमे वयल्या शेजारच्या देशांनी खंयच्याय क्षेत्रांत थेट परकी गुंतवणूक करपा खातीर सरकाराची मान्यताय घेवप गरजेचें आसा. देशांत एप्रिल 2000 ते मार्च 2024 मेरेन जाल्ल्या थेट परकी गुंतवणूकींत चीनाचो वाटो फकत 0.37 टक्के म्हळ्यार फकत 2.5 अब्ज डॉलर आसा. भारतांत थेट परकी गुंतवणूक करपी देशां मदीं चीन सध्या 22व्या क्रमांकाचेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
