भांगरभूंय | प्रतिनिधी
-दक्षीण गोंयांत 106 चिरेखणी आशिल्ल्याची नोंद
पणजी: प्रतिबंधात्मक उपाय येवजण्यो करपा खातीर चिरेखणींचो तशेच हेर खणींचो सोद घेवपाची जापसालदारी जिल्होधिकाऱ्यांनी मामेलदारांचेर सोंपयल्या. चिरेखणींचे थळ आनी म्हायती मेळ्ळे उपरांत थंय राखणे वणत (फेंसींग) करपा विशींचो आराखडो भौशीक बांदकाम खात्या वरवी जातलो, अशी म्हायती अधिकाऱ्यांनी दिली.
नानोडें- दिवचले चिरेखणीत बुडून दोगां तरणाट्यांक मरण आयलें उपरांत चिरेखणी सुरक्षीत नाशिल्ल्याचे सिद्द जालां. गांवगिऱ्या वाठारांनी बरेच कडेन चिरेखणी आसात. पावसांत ह्या चिरेखणींनी उदक भरतां. तरणाटे तशेंच ल्हान भुरगे लेगीत ह्या चिरेखणीनी पेंवपाक देंवतात. ताका लागून बुडून मरण येवपाच्या घडणुकांनी वाड जाल्ल्यान सरकारान घसघशे, तळीं तशेंच चिरेखणींचेर पेंवपाचेर बंदी घातल्या.
तळीं तशेच घसघशे फामाद आशिल्ल्यान तांची म्हायती प्रशासना कडेन आसा. चिरेखणींची मात म्हायती ना. दक्षीण गोंयांत 106 चिरेखणी आशिल्ल्याची नोंद आसा. चिरेखणींचो सोद घेवन तांच्या थळांची म्हायती दिवपाक मामलेदारांक सांगलां. मामलेदारां कडल्यान म्हायती मेळ्ळे उपरांत चिरेखणी खंय आसात ते कळपाक मजत जातली, अशी म्हायती दक्षीण गोंयचे जिल्होधिकारी आश्वीन चंद्र हांणी दिली. चिरेखणींची म्हायती मेळ्ळे उपरांत भौशीक बांदकाम खात्या वरवीं थंय राखणे वणत (फेंसींग) घालपा विशीं आराखडो तयार जातलो. आचारसंहिता सोंपले उपरांत प्रतिबंधात्मक उपायांचो आराखडो तयार करप शक्य जातलें, अशें तांणी सांगलें.
उत्तर गोंंयांत लेगीत जिल्होधिकारी कार्यालयान चिरेखणी/खणींचो सोद घेवपाच्यो सुचोवण्यो मामलेदारांक केल्या. उत्तर गोंयातल्या चिरेखणींचो आंकडो मात जिल्होधिकाऱ्यां कडेन उपलब्ध ना. उत्तर गोंयांत लेगीत शंबराचेर चिरेखणी/खणी आसपाक जाय, अशी म्हायती एके अधिकाऱ्यांनी दिली.
घसघशे, तळीं हांचे कुशीक वर्दळ आसता. चिरेखणीं रानां वाठारांत आशिल्ल्यान बऱ्याच जाणाक तांची म्हायती नासता. हाका लागून चिरेखणींत देवपाक मेळचे न्हंय, म्हूण प्रतिबंधात्मक उपाय येवजण्यो करपाचेर भर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
