चिरंतन आवाज

भांगरभूंय | प्रतिनिधी

ह्या बोवाळाक लागून शांत जीण सारपाक गोंयांत आयिल्ले पर्यटक परत वतात, नवे येनात. हाचो परिणाम पर्यटनाचेर जावचो ना?

हालींच्या वर्सांनी सगल्यांचीच भलायकी इबाडल्या. कामाचो ताण, मोबायल फोनाचो हिस्पा भायर वापर, रातचें बारा जाले उपरांत न्हिदप, 10 उपरांत जेवप, एकाच जाग्यार बसप, देडशें मिटर अंतराचेर वचपाक गाडी भायर काडप, व्यायामाचो उणाव, दुस्वास, न्हयकारात्मकताय, ताण, म्हारगाय, भेसळ, सोरो, ड्रग्स, भायल्यो भानगडी, भ्रश्टाचार, बेकारी…. अशीं जायतीं कारणां आसात आरोग्य पेड्डेर जावपाक. दुयेंत पडपाक कसलेंय निमित्त पुरो जाता. आनीक एक कारण आसा, तें म्हणल्यार आवाजाचें प्रदुशण. फक्त मनशांकूच न्हय, तर सुकणीं, सावदां, सरपटपी जिवांक…. सगल्यांकूच ताची बादा जाता. न्यायसंस्थेन रातचीं 10 ते सकाळीं 6 मेरेन व्हडल्या आवाजान संगीत लावपाक बंदी घाल्ली. मात त्या आदेशाक कांय राष्ट्रद्रोही लोकांनी कोयराच्या बल्लांत उडयला. आमच्या गोंयाकूय ती बंदी लागता. पूण, आमचें राज्य हें पर्यटन केंद्र आशिल्ल्यान आनी कोट्यांनी रुपयांच्या अर्थीक वेव्हाराचेर परिणाम जावपाची शक्यताय आशिल्ल्यान गोंय सरकारान ती कांय सणां, परबां खातीर रातचीं 12 मेरेन सदळ करपाची विनवणी न्यायसंस्थेक केल्ली. तरीय कोर्टाचो आदेश मानिनासतना आपल्या मनाक येता तशें रातभर संगीत वाजोवपाचो सोपूतच कांय वेवसायिकांनी घेतला, अशें हालींच्या कांय दिसांतल्यो घडामोडी पळयल्यार दिसता.
हालींच हणजूणें, वागातोर, बागा आनी हेर दर्यावेळांचेर रातच्या 10 उपरांत व्हडल्या आवाजांत संगीत वाजता म्हूण थळाव्यांनी मेणवात मिरवणूक काडली. लोकांची तिडक पळोवन खुद्द थळावी आमदार डिलायला लोबो हांणी थळाव्यांक वांगडा घेवन पुलिसांची भेट घेतली. तांचे कडेन भासाभास केली. पुलिसांनी 10 चे टोले घडयाळींत पडपाक लागले काय दुसर्‍या खिणाक संगीत बंद जातलें, अशें उतर दिलें. मात तरीय संगीत बंद जावंक ना. घडये स्वतंत्रताय दिसाचो जोश आसतलो. तो मनोवपाक सगल्या वेवसायिकांनी खंय पार्टी दवरिल्ल्यो. शेनवार, आयताराच्योय अर्थांत त्यो आसतल्यो. देखून थळावे अजून पेटयिल्ल्यो मेणवाती घेवन मूक आंदोलन करतात. पुलीस, न्यायालय, लोकप्रतिनिधी हांचे परस कोण व्हडलो थारलो, तें आतां वाचप्यांनीच थारावचें. पयर इंडी आघाडेन आंदोलन केलें. द. गोंयचो खासदार उत्तर गोंयांत आयलो. ह्या आंदोलनाचे व्हिडियो आयल्यात, ताचे प्रमाण, कायद्यान सील केल्ल्या रिसोर्टात व्हडा – व्हडान संगीत वाजोवन पार्ट्यो आयोजीत जातात खंय. हें कायद्याक किंकोत केल्ले सारकें जालें ना? सील केल्लो रिसोर्ट परवानगे बगर चालू करूंक मेळटा. आंदोलकांक पळोवन पुलीस आयले आनी त्या रिसोर्टांतलें संगीत बंद जालें, लायटीय पालवल्यो. आंदोलकांनी पुलिसांक भितर वचून तपासपाची विनवणी केली. मात ते खंय वचूंक नात. हाका कितें म्हणपाचें? आंदोलक जमिल्ले थंय प्रदुशण नियंत्रण मंडळाचे अधिकारीय आशिल्ले. पूण तांकांय कांय करपाक जमना, असो थळाव्यांचो आरोप.
दर्यादेगांक खूब जाण वेवसाय करतात, संगीत बंद केलें वा खंयचोय वेवसाय बंद केल्यार गोंयकार लोक उपाशी पडटले, बेकारी वाडटली, पूण रातचो 10 उपरांत आवाज जावंक जायना, अशे एका थळाव्या राजकी फुडाऱ्यान सांगलें.
आमी लोकां बरोबर आसात, अशेंय सांगपाक तो विसरलो ना. दर्यावेळांचेर ज्यो अपप्रवृत्ती घुसल्यात, त्यो सगल्यांक खबर आसात. तांचे आड कोणूच कांय करिनात, मात कितेंय जालें काय आमी लोकां बरोबर आसात, अशें सांगून लोकप्रतिनिधी आंदोलनांत वांटेकार जातात. तें सोंपलें काय सगले आपापल्या कामाक……! पुलिसांचेरूय वयल्यान चेपण येता, काय ते स्वताच संगीत वाजोवपाक वेवसायिकांक मेकळीक दितात? हांगा वेवसाय करपी चडशे परप्रांतीय. तांचीं पोटां भरपाक गोंयकारांनी कित्याक त्रास, मनस्ताप सोंसपाचो, असोय विचार लोक उक्तायतात. हणजूणें, वागातोर वाठारांत आवाजाच्या प्रदुशणाक लागून तीन मनशांक मरण आयलां अशें एक बायल सांगतना आयकूंक येता. हातूंत फट कांय आसचें ना. कारण पणजे संगीत वाजले काय तें म्हापश्यां आयकूंक येतलें, इतलें व्हडलें आसता. तातूंत पर्यटकांक कितें खोस मेळटा तें कळना. टल्ली जालो काय कानांक आपशीच गुड्डो बी बसना मूं?
ल्हान भुरगीं, दुयेंती, जाण्ट्यांक आवाजाच्या प्रदुशणाचो चड त्रास जाता. मोनजातूय हातूंत भड्डटा. लोकांच्या पोशिल्ल्या जनावरांचें कितें जाता आसतलें काय? वेळ बारीकसाणेन पाळपी सुकण्यांचें वेळापत्रक रातभर संगीत वाजिल्ल्यान इबाडटा. नरकासूराची रात, नव्या वर्साची रात आनी हरशीच्या दिसांनीय बी आवाजा मळबाक तेंकिल्लो आसता. बरें हें संगीत कसलें तर, फक्त वाद्यांक मारपेट करतकच आवाज येतलो तसलें. रांदचे कुडींत आयदनां पडटा, तो आवाज पसून सोंसू येता, पूण न्हय हो विदेशी ट्रान्स संगिताचो. ह्या बोवाळाक लागून शांत जीण सारपाक गोंयांत आयिल्ले पर्यटक परत वतात, नवे येनात. हाचो परिणाम पर्यटनाचेर जावचो ना? काय आमकां असलेच सोरो, ड्रग्समोगी, रातभर दुसऱ्यांची पर्वा करिनासतना मनीसपण विकून खावपी सुवार्थी पर्यटकूच
जाय??