भांगरभूंय | प्रतिनिधी
बिजींग, खबरां संस्था: चिनांतल्यान एक धक्को दिवपी खबर मुखार आयल्या. चिनांतल्या मसणभुंयेंतल्यान आनी वैजकी प्रयोगशाळांतल्यान सुमार ४ हजारां परस चड मडीं चोरून तांचीं हाडां विकल्यांत. हीं हाडां दांत करपा खातीर विकल्यांत. ही धक्को दिवपी म्हायती चीनी अधिकार्यांनी केल्ले चवकशेंतल्यान उक्ती जाल्या.
१८ टन हाडां जप्त
मेळिल्ले म्हायती प्रमाण चिनांतले कांय पंगड मनशाच्यो मरण आयिल्ल्यो कुडी चोरतात हें मुखार आयलां. तशेंच त्यो चोरून तांचीं हाडां विकतात अशेंय कळ्ळां. शांक्सी प्रांतांतल्या तैसुआानांत पुलिसांनी केल्ले चवकशे वेळार ही म्हायती उक्ती जाल्या. ह्या चोरांचे पंगड खूब पयशे जोडटात हेंय उजवाडाक आयलां. मजगतीं, पुलिसांनी हालींच १८ टन मनशांचीं हाडां आनी तातूंतल्यान तयार केल्लीं ३५ हजार उत्पादनां जप्त केल्यांत.
हातूंत पुलिसां सयत कर्मचार्यांचोय आस्पाव
हिप रिप्लेसमेंटाची शस्त्रक्रिया करपी दुयेंतीच्या संमतीनूच तांचीं हाडां प्रत्यारोपण करपा खातीर काडटात. चिनांत दफनभूंयेंतल्यान जायत्यो कुडी नाशिल्ल्याच्यो कागाळी पुलिसांनी दाखल केल्यात. तांतलीं कांय प्रकरणां सुटल्यांत. मेल्ले कुडींच्या हाडांचो वेपार करून जायते लोक गिरेस्त जाल्यात. हीं सगळीं वायट कर्तुपां करपी संघटीत गटां कडेन पुलीस मेळून आसात असो आरोप सध्या जाता. हातूंत दफनभूंयेच्या कर्मचार्यांचोय आसपाव आसा अशें कळ्ळां. मजगतीं, पुलिसांनीय ह्या प्रकरणांत कांय जाणांक अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
