भांगरभूंय | प्रतिनिधी
इफ्फीच्या मास्टरक्लास विभागाचें उक्तावण
पणजी : चित्रपटांक लागून मनशाचेर वेगळे परिणाम जातात. चित्रपटांत संवसार बदलपाची तांक आसा. म्हजी आजूनय हाचेर विस्वास आसा. म्हणूनच हांव आयज हांगा हाजीर आशिल्ल्याचें मत चित्रपट दिग्दर्शक मुजफ्फर अली हांणी उक्तायलें. शुक्रारा इफ्फींतल्या मास्टर क्लास विभागांत तांचे पुत शाद अली हांणी तांची मुलाखत घेतली. ह्या वेळार मुजफ्फर हांणी चित्रपट मळावेलो आपलो प्रवास सांगलो. ताचे पयलीं केंद्रीय म्हायती आनी प्रसारण राज्यमंत्री एल मुरुगन हांचे हस्तुकीं मास्टरक्लास विभागाचें उक्तावण जालें.
मुजफ्फर हांणी सांगलें, झुनी चित्रपटांतल्यान हांवें काश्मिरची वेगळी वळख, हांगच्या लोकांच्यो समस्या दाखोवपाचो यत्न केला. काश्मीर हें फकत व्हिडियो काडपाचें स्थळ न्हय, थंयसरूय संस्कृती आसा, लोक आसात, तांचे प्रस्न आसात ते म्हाका दाखोवपाचे आशिल्ले. इराणी चित्रपट सगल्यांकूच आवडटात. इराणी दिग्दर्शकांनी खुबश्यो समस्या आसूनय आपल्या भागांतलीं तथ्यां दाखोवपी चित्रपटांची निर्मिती केली. म्हाका काश्मीरांतल्या तरणाट्यां कडल्यान हेंच अपेक्षीत आसा. काश्मीरच्या थळाव्या तरणाट्या कलाकारांनी मुखार सरचें अशें म्हाका दिसता.
दिग्दर्शन शाद अली हांणी, झुनी चित्रपटाचें चित्रीकरण पुराय जावचे पयलींच काश्मीरची परिस्थिती इबाडिल्ली. हाका लागून मुजफ्फर हांकां हो चित्रपट करप सोडून दिवचें पडिल्लें. मात आयज ३४ वर्सांनी म्हाका ह्या चित्रपटाचें रिस्टोरेशन करून तो परत प्रदर्शीत करपाची संद मेळ्ळ्या. म्हज्या बापायची अपूर्ण कलाकृती मम्हाका पुराय करपाक मेळप, हो म्हजो अभिमान अशें हांव समजतां. म्हजे खातीर चित्रपट हें एखाद्या मानसोपचार तज्ञा प्रमाण काम करतात. चित्रपट हासयतात, अजापीत करतात. चित्रपटांत खरी जादू आसता अशें म्हाका दिसता.
चित्रपट मळार भारताचो प्रभाव वाडला
ताचे पयलीं केंद्रिय राज्यमंत्री एल मुरुगन इफ्फी सारके महोत्सव जगभरांत भारताच्या वाडत्या चित्रपट प्रभावाचें प्रतिनिधित्व करता अशें सांगलें, तांणी म्हणलें, इफ्फी हो विकसीत भारताच्या दिकेन सुरू आशिल्ल्या प्रवासा कडेन सुसंगत आसा. महोत्सवांत बायलां सक्षमीकरणाचो एक भाग म्हणून बायलांनी दिग्दर्शीत केल्ले ५० चित्रपट दाखयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
